НИЙГЭМ

Монгол Улсын сайд, ЗГХЭГ-ын дарга Д.Амарбаясгалангаар ахлуулсан Шуурхай бүлэг Завхан аймагт ажиллаж байна. Завхан аймгийн Онцгой комисс, Улсын онцгой комиссын Шуурхай бүлгийн хамтарсан өргөтгөсөн хуралдаан өнөөдөр боллоо. Тус аймаг өвс тэжээлийн нөөцийнхөө 82 хувийг бэлтгэжээ. Өнөөдрийн байдлаар нийт бэлтгэсэн өвсний 1059,1 тонн, тэжээлийн 701 тонныг зарцуулаад байна. Завхан аймагт ажиллаж буй Шуурхай бүлгээс аймгийн Онцгой байдлын газарт улсын нөөцөөс үнэ төлбөргүй олгосон 400 тонн тэжээлийг хүргэж өглөө.Энэ сарын 11-16-нд өдөр шөнийн температурын зөрүүгээс шалтгаалж цасан дээр 2-3 см мөсөн үе үүсэж Нөмрөг, Отгон, Тэс, Тэлмэн сумын нутгаар төмөр буюу мөсөн зуд үүсэх нөхцөл бүрдсэн байна. 45 мянга гаруй мал хорогджээ.Энэ сарын 18-ны байдлаар  тус аймагт цасны зузаан 1-35,  хунгарын зузаан 18-80, гуу жалгандаа 20-120, хөрний зузаан 2-25, мөсөн бүрхэвчийн зузаан 2-3 см тогтжээ. Мөн энэ сарын 12-17-нд цас орж шуурсны улмаас  орон нутгийн чанартай зам, даваа хаагдаж, 17 сумын  54 багийн 2,256 малчин өрх төрийн болон бусад үйлчилгээ авах боломжгүй, 194 хүүхэд хичээлдээ ирж чадахгүйд хүрчээ.  Монгол Улсын сайд, ЗГХЭГ-ын дарга Д.Амарбаясгалан “Малчид Засгийн газраас дэмжлэг үзүүлж байгаад талархаж байгаа ч амьжиргааны түвшнийг дээшлүүлэх талаар бодлого хэрэгжүүлэхийг санал болгож байна. Засгийн газар энэ удаад улсын нөөцөд байсан 6000 тонн тэжээл, орон нутгийн нөөцөд байсан 20000 тонн тэжээлийг малчдадаа үнэгүй хүргэж өгч байна. Хоёрдугаар ээлжинд хүчит тэжээлийг хүргэхээр бэлтгэж байна.  Мөн хүнс болон эм тариаг УОК-оос хүргэнэ. Импортын гурил, тэжээлийн татварыг тэглэх асуудлыг Засгийн газрын ирэх ирэх хоногийн хуралдаанаар шийдвэрлэнэ” гэлээ. Засгийн газраас тус аймгийн дөрвөн суманд энэ оны эхний улиралд багтаан туулах чадвар сайтай автомашин олгохоор шийдвэрлэсэн. Мөн аймгийн эрүүл мэндийн салбарт автомашин олгох асуудлыг Засгийн газрын хуралдаанд оруулж хэлэлцүүлнэ гэдгийг ЗГХЭГ-ын дарга Д.Амарбаясгалан онцоллоо.

Сэлбэ голын урсацыг сайжруулах, шар усны үерийн эрсдэлээс сэргийлэх зорилгоор энэ сарын 15-аас эхлэн тус голын мөсийг зөөж эхэлсэн. Нийт зургаан экскаватор, 21 хово, нэг бобкат, нэг портер, нэг ковш техниктэйгээр ажиллаж, өнөөдрийн байдлаар 824 рейсээр 16480 тонн мөсийг зөөж тээвэрлэн, Туул голын сав газарт буулгаад байна.Нийслэлийн 33 байршилд халиа тошин үүсэж, шар усны үер болох эрсдэл бий болсон тул эхний ээлжид Сэлбэ, Толгойт гол болон Дэнжийн мянга орчмын 10 байршлын 25 км орчим газрын мөсийг зөөж тээвэрлэхээр төлөвлөөд буй.

24-ийн цэцэрлэгт ажилладаг нэгэн багш ийнхүү бичжээ: Сайн байцгаана уу. Би 24-ийн цэцэрлэгт ажилладаг цэцэрлэгийн багш байгаа юмаа. Би ангидаа нийт 45 хүүхэдтэй ажиллаж байна. 24-ийн цэцэрлэгт хүүхдээ явуулах сонирхолтой аав ээжүүд түгээмэл болжээ. 24-ийн цэцэрлэгт хүүхдээ өгснөөр хүүхэд хурдан биеэ даана, хувцас эд хэрэглэлээ төвөггүй хэрэглэж, өмсөж , тайлж сурна. Мөн хичээлүүдээ бие даагаад хийчихдэг болно. За бусад нь гэвэл, 24-ийн хүүхдүүд шөнө маш их уйлдаг. Нэг нь уйлахад бусад нь дагаж уйлдаг. Зарим нь орондоо өдөр бүр шээнэ. Уйлж байгаа ганц шалтгаан нь аав ээж , гэр бүлээ санасан нь тэр. "Санаад байна аа нэг залгаад өгөөч багшаа, нэгхэн утсаар ярьчихъя л даа багшаа" гэж гуйна. За тэгээд 5 дахь өдөр болно. Бүгд гэр лүүгээ явна гээд бөөн баяр хөөр догдлол байдаг. Гэвч 5 өдөр байлгачихаад нэг өдөр эрт ирээд авчихаж чаддаггүй хүмүүс бас байдаг. Найзууд нь ар араасаа гэр лүүгээ яваад л байдаг , яг нөгөө уйлдаг, уцаарладаг хүүхдүүдийн аав ээжүүд нь байхгүй алга болчихно. Багш бид нар бол хүүхдүүдийнхээ төлөө өдөр шөнөгүй л хараад сууна. Бид нарын ажил, сууж сайн харах ёстой. Зарим нэгэн хүүхдүүд зүүдлээд босоод явдаг учраас хараа салгаж болохгүй. Яагаад аав ээжүүд маань хүүхдээ өөрөөсөө ингэж түлхээд байдаг юм бэ. Нэг мэдэхэд л том болцгооно шүү дээ. Мөнхөд хажууд чинь жаахнаараа , нялхаараа байхгүй учраас нэг өдөр ч гэсэн хүүхдээ хайраар битгий дутаа л даа. Хүүхдүүдээ хараад өрөвдсөн багш... Хүүхдүүд минь хажууд уйлаад байхад үнэхээр хэцүү байдаг. Бид багш нь учраас тэврэхээс өөр зүйл хийж өгч чадахгүй. Нэг өдөр ч гэсэн хөтлөөд гүйхийг , нэг өдөр ч гэсэн халуун энгэртээ тэврээд унтахыг хичээгээрэй. Ажил нь 1-т үү , хүүхэд нь 1-т үү?!

Цаг агаар: Өнгөрсөн хоногт: Баян-Өлгий, Баянхонгор, Ховд аймгийн нутгаар бага зэргийн цас орсон. Бусад нутгаар цаг агаар тогтуун байлаа.Шөнөдөө Дархадын хотгор болон Хөвсгөлийн уулархаг нутаг, Завхан голын эх, Идэр, Тэс, Эг, Үүр, Тэрэлж, Хэрлэн голын хөндийгөөр -38...-43 градус, Увс нуурын хотгор, Хангай, Хэнтийн уулархаг нутаг, Хүрэнбэлчир орчим, Байдраг, Орхон, Сэлэнгэ, Хараа, Ерөө, Туул, Онон, Улз, Халх голын хөндий, Дорнод-Дарьгангын тал нутгаар -30...-35 градус, Алтайн уулархаг нутаг болон говийн бүс нутгийн хойд хэсгээр -25...-30 градус, Их нууруудын хотгор болон Алтайн өвөр говиор -15...-20 градус, бусад нутгаар -20...-25 градус байлаа.Өнөөдөр: Шөнөдөө зүүн аймгуудын нутгаар багавтар үүлтэй, бусад нутгаар үүлшинэ, өдөртөө ихэнх нутгаар солигдмол үүлтэй. Шөнөдөө Алтайн уулархаг нутгаар, өдөртөө Хангайн уулархаг нутаг болон Орхон голын сав газраар цас орж, зөөлөн цасан шуурга шуурна.  Нутгийн баруун хагаст баруун өмнөөс, бусад нутгаар баруун хойноос секундэд 5-10 метр, Монгол-Алтайн уулархаг нутгаар секундэд 12-14 метр хүрч ширүүснэ. Өдөртөө Дархадын хотгор, Тэс голын хөндийгөөр -26...-31 градус, Увс нуур болон Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Эг, Үүр, Ерөө, Халх голын хөндийгөөр -17...-22 градус, Их нууруудын хотгор, говийн бүс нутгийн өмнөд хэсгээр -8...-13 градус, бусад нутгаар -13...-18 градус хүйтэн байна. Улаанбаатар хотод: Шөнөдөө багавтар үүлтэй, өдөртөө үүлшинэ. Цас орохгүй. Салхи баруун өмнөөс секундэд 3-8 метр. Шөнөдөө Яармаг-Сонгины орчмоор -38...-40 градус, бусад хэсгээр -30...-32 градус, өдөртөө -13...-15 градус хүйтэн байна.Гал түймэр: Объектын түймэр:- Улаанбаатар хот, Сонгинохайрхан дүүрэг. 28 дугаар хорооны Ногоон чулуут 4 дүгээр гудамжинд нам даралтын зуух дэлбэрсэн гэсэн дуудлагыг 02.21-ний өдрийн 22:23 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 29 дүгээр ангийн алба хаагчид 3 км замыг туулан 22:26 цагт очиход иргэн Б-ын 9х9 метрийн хэмжээтэй 2 давхар байшингийн 3х3 метрийн хэмжээтэй галлагааны өрөөнд цаас шатаж байсныг 5 минут ажиллаж унтраасан.- Улаанбаатар хот, Баянзүрх дүүрэг. 28 дугаар хорооны Хужир булангийн 2 дугаар гудамжинд байшин шатаж байна гэсэн дуудлагыг 02.22-ны өдрийн 04:00 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 35 дугаар ангийн алба хаагчид 2 км замыг туулан 04:03 цагт очиход иргэн М-ын 10х15 метрийн хэмжээтэй автомашины дулаан гараашны дээвэр, 3х3 метрийн хэмжээтэй галлагааны өрөөний дээвэр хэсэг шатаж байсныг 10 минут ажиллаж унтраасан.- Төв аймаг, Аргалант сум. Хөшөөт багийн автозам дагуух "Оргил булаг" цайны газрын хажууд /аймгийн төвөөс баруун зүгт 96 км, сумын төвөөс баруун урд зүгт 35 км/-т 02.22-ны өдрийн 00:44 цагийн орчим өвс ачсан ачааны автомашин ачааны хэсгээсээ шатаж эхэлсэн тухай мэдээллийг мөн өдрийн 00:52 цагт хүлээн авсан. Тус сумын Мэргэжлийн ангийн 3 ажилтан 01:51 цагт очиход 2.5 тн өвс ачсан иргэн З-ийн "Beiben North Benz ND4251" загварын ачааны автомашины ачааны хэсэг шатаж байсныг орон нутгийн 6 иргэн өвсийг автомашинаас буулган тарааж галыг унтраасан байсан тухай иргэн Б аймгийн Онцгой байдлын газарт мэдээлсэн. - Хэнтий аймаг, Өмнөдэлгэр сум. Гурванбаян 7 дугаар багийн “Хурх” тосгоны “Баян” хорооллын 3 дугаар гудамжны 309 тоот /аймгийн төвөөс хойд зүгт 120 км, сумын төвөөс зүүн зүгт 50 км/-д 02.21-ний өдрийн 14:50 цагийн орчим байшин шатсан тухай мэдээллийг 02.21-ны өдрийн 15:43 цагт хүлээн авсан.Тус аймгийн “Хурх” тосгоны Захирагчийн ажлын албаны дарга М.Мөнхжаргалаар ахлуулсан 11 ажилтан,  орон нутгийн 50 иргэнтэй хамтран 14:52 цагт очиход М-ийн 5х6 хэмжээтэй дүнзэн байшин, эд хогшлын хамт бүрэн шатаж байсныг 38 минут ажиллаж  унтраасан тухай мэдээллийг тус сумын “Хурх” тосгоны Захирагчийн ажлын албаны дарга аймгийн Онцгой байдлын газарт мэдээлсэн. Хүний үйл ажиллагаатай холбоотой осол. Цас шаварт суусан: - Өвөрхангай аймаг, Хужирт сум. Өвөрмодот 1 дүгээр багийн "Хад бригад" гэдэг газар /аймгийн төвөөс хойд зүгт 70 км, сумын төвөөс баруун урд зүгт 17 км/-т Арвайхээр сумаас Бат-Өлзий сумын чиглэлд зорчиж явсан 2 зорчигчтой суудлын автомашин цасан суусан тухай дуудлагыг 02.22-ны өдрийн 00:05 цагт хүлээн авсан. Тус аймгийн Онцгой байдлын газрын Хужирт сум дахь Эрэн хайх, аврах бүлгийн алба хаагчид 10 км замыг туулан 01:00 цагт очиход иргэн М-ын “Toyota Kluger” загварын суудлын автомашин цасанд суусан байсныг 30 минут ажиллаж татан гарган автомашин эвдэрсэн байсан тул үлдээж, хоёр иргэнийг сумын төвд аюулгүй газар хүргэж өгсөн.- Хэнтий аймаг, Галшар сум. Баянбадрал 3 дугаар багийн "Хужирт " гэдэг газар /аймгийн төвөөс  урд зүгт 100 км, сумын төвөөс хойд зүгт 40 км/-т Өндөрхаан сумаас Галшар сумын чиглэлд зорчиж явсан 7 зорчигчтой /6 том хүн, 1 хүүхэд/ суудлын автомашин цасанд суусан тухай дуудлагыг 02.22-ны өдрийн 05:39 цагт хүлээн авсан. Тус аймгийн Онцгой байдлын газрын Бор-Өндөр сум дахь Гал түймэр унтраах, аврах 49 дүгээр ангийн алба хаагчид 40 км замыг туулан 07:35 цагт очиход иргэн М-ын “Toyota Prius-20” загварын суудлын автомашин цасанд суусан байсныг 20 минут ажиллаж татан гаргасан.ОНЦГОЙ БАЙДЛЫН ЕРӨНХИЙ ГАЗАР 

Монгол Улсын Ерөнхийлөгчийн Тамгын Газрын Хүнсний төсөл, хөтөлбөрийн алба, УОК-ын Шуурхай штаб,  ХХААХҮЯ,  Хүнс, хөдөө аж ахуйн салбарын эрдэмтдийн зөвлөл, "Хүнсний хувьсгал"  ТББ, Баялаг бүтээгчдийг дэмжих холбоо болон үндэсний үйлдвэрлэгчдийн төлөөллийг оролцуулсан "Зудыг хохирол багатай даван туулах шуурхай зөвлөгөөн"  боллоо.Тус зөвлөгөөний үеэр өвөлжилтийн нөхцөл байдал болоод авч хэрэгжүүлж байгаа арга хэмжээг УОК-ын Шуурхай штабаас танилцуулж, оролцогчид цаашид хэрхэн хамтран ажиллах талаар санал солилцсон юм.Улс орны хэмжээнд нүүрлээд байгаа зудын гамшигт өртсөн малчин түмэн, мал сүргээ хамгаалахад туслах аянд Хүнс, хөдөө аж ахуйн салбарын эрдэмтдийн зөвлөл, "Хүнсний хувьсгал" ТББ, Баялаг бүтээгчдийг дэмжих холбоо болон үндэсний үйлдвэрлэгчид нэгдэж байгаагаа илэрхийллээ.

Сангийн сайд Б.Жавхлангаар ахлуулсан шуурхай бүлэг Төв аймгийн Эрдэнэсант, Өндөрширээт, Лүн, Дэлгэрхаан, Бүрэн, Баян-Өнжүүл, Алтанбулаг сумдад ажиллаж байна. Тус аймгийн нийт нутгийн 80 хувьд өвөлжилт хүндэрч, цасны зузаан 15-30 см-т хүрчээ. Аймгийн хэмжээнд 112 мянган мал хорогдож, малчид хүнс, өвс тэжээлийн хомсдолд орсон байна. Тухайлбал, 200 гаруй толгой малтай байсан Эрдэнэсант сумын малчин Г.Галсандоржийнх 50 гаруй л малтай үлджээ. Сумын төвөөсөө 16 километр зайд өвөлжиж байгаа С.Эрдэнэ-Очирынхоос төв орох зам хаагдаж, цасанд дарагджээ. Тэднийх 400 гаруй толгой малтай тоолуулсан, 30 хувьтай нь л үлджээ. Сангийн сайдаар ахлуулсан шуурхай бүлэг хоёр хуваагдаж малчдад нэн яаралтай өвс тэжээл, эрүүл мэндийн тусламж үзүүлэх, сум, багууд руу зам гаргах, сумдад шаардлагатай машин илгээх зэргээр тулгамдсан асуудлуудыг цаг тухайд нь шийдвэрлэж байна.Сангийн сайд Б.Жавхлан “Өнгөрөгч долоо хоногийн Засгийн газрын хуралдаанаар улсын хэмжээнд гамшгаас хамгаалах өндөржүүлсэн бэлэн байдал зарласан. Өндөржүүлсэн бэлэн байдал зарлахаас өөр аргагүй байна. Зургаан бүсийн чиглэлд шуурхай бүлэг гарч ажиллаж байна. Онцгой байдлын газраас хийсэн үнэлгээгээр Төвийн бүсийн гурван аймгаас Төв аймаг маш хүнд гэж гарсан. Төв аймгийн зарим сум шилэн зудтай байна. Ялангуяа, урд талын зургаан сум маш хүнд байдалтай байна. Шилэн зудтай Эрдэнэсант сумаас манай бүлгийн ажил эхэлсэн. Нийт зургаан сум байгаа учраас манай бүлэг хоёр хэсэгт хуваагдаж малчдын хотонд шуурхай тусламж үзүүлэхээр ажиллаж байна. Аймаг, сумын төрийн албан хаагч, онцгой байдлын ажилчид бүхий л боломжоороо сайн ажиллаж байна. Тухайлбал, Эрдэнэсант сумыг тойрсон цасанд хаагдсан 1500 км замыг нээсэн. Харамсалтай нь тасралтгүй үргэлжилж байгаа шуурганаас болж хоёр хоногийн дараа өнөөх нээсэн зам буцаад хаагдчихаад байна. Тиймээс малчдад шаардлагатай эрүүл мэнд, өвс тэжээл болон бусад үйлчилгээг үзүүлэх, зэрлэг ан амьтдад ч өвс тэжээл хүргэх хэрэгтэй байна. Өнөөдөр малчдад нэн шаардлагатай тусламж нь хаагдсан зам, давааг нээх. Тиймээс сумын төв орох зам гаргахад шаардагдах машин техник, шатахуун олгож, зарим сумын ШТГ-дад тавьсан өрийг тэгэллээ. Дархан-Уул аймгаас тусламжаар хоёр ковш авчирч малчдын өвөлжөө рүү зам гаргуулахаар болсон. Мөн хивэг, тэжээл өвсийг малчдынд хүргүүлж байна гэдгийг хэлээд нэн хүнд энэ цаг үеийг монголчууд нэгдмэл байж давж гаръя гэж уриаллаа.

Монгол Улсын Ерөнхий сайдын тэргүүлдэг Хүүхдийн төлөө үндэсний зөвлөл нь Хүүхдийн эрхийн тухай хуульд заасны дагуу хүүхдийн эрхийг хангах, эрх нь зөрчигдөхөөс урьдчилан сэргийлэх, хүүхэд хамгаалал, хөгжлийн талаарх төрийн бодлого, хууль тогтоомжийг хэрэгжүүлэхэд нийгмийн нөөц баялгийг дайчлах, салбар дундын үйл ажиллагааг уялдуулан зохицуулах шаардлагатай арга хэмжээ авах, хүүхдийн эрхийг хангах, эрх нь зөрчигдөхөөс урьдчилан сэргийлэх, хүүхэд хамгаалал, хөгжлийн үйл ажиллагааны талаар холбогдох төрийн байгууллагад чиглэл, хуулийн этгээдэд зөвлөмж өгөх чиг үүргийг хэрэгжүүлдэг. Тус зөвлөлийн бүрэлдэхүүнийг Монгол Улсын Засгийн газрын 2023 оны 352 дугаар тогтоолоор шинэчлэн баталсан. Шинээр томилогдсон гишүүд батлагдсан удирдамжийн хүрээнд бүх яамдад ажиллаж, Хүүхэд хамгааллын тухай хууль /шинэчилсэн найруулга/-ийг хэрэгжүүлэх бэлтгэл ажлыг хангуулах, Хүүхдийн эрхийн тухай НҮБ-ын конвенц болон тухайн салбар дахь хүүхдийн эрх, хамгааллын талаарх хууль тогтоомжийн хэрэгжилт, хэрэгжүүлж буй бодлого, үйл ажиллагаатай танилцаж, зөвлөн туслах уулзалтыг зохион байгуулах юм. Энэ хүрээнд өнөөдөр Эрүүл мэндийн яаманд уулзалтыг зохион байгуулж, эрүүл мэндийн салбар дахь хүүхдийн эрхийг хангах, хамгаалах чиглэлээр хэрэгжүүлж байгаа хууль тогтоомжийн хэрэгжилт, Хүүхдийн эрхийн тухай конвенцын 5 дугаар зөвлөмжийн хэрэгжилт болон тус салбарын Хүүхэд хамгааллын бодлоготой танилцав.Уулзалтад Хөдөлмөр, нийгмийн хамгааллын яамны Төрийн нарийн бичгийн дарга Э.Ганхүү, Эрүүл мэндийн яамны Төрийн нарийн бичгийн дарга С.Төгсдэлгэр, Зөвлөлийн гишүүн Н.Нямдорж, П.Цэвээн болон холбогдох асуудал хариуцсан албан хаагчид оролцов. Уулзалтаас гарсан тухайн салбарт тулгамдаж буй асуудал, санал, хүсэлтийг Хүүхдийн төлөө үндэсний зөвлөлийн хуралдаанд танилцуулж, холбогдох байгууллагад зөвлөмж, чиглэлийг хүргүүлэх юм.

MCS групп малчдад туслах хандивын аянд нэгдэж 500 сая төгрөг бэлнээр, мөн бараа бүтээгдэхүүн, үйлчилгээ зэрэг нийт тэрбум гаруй төгрөгийн тусламж олгохоор болов. MCS холдингийн гүйцэтгэх захирал Л.Гантөмөр, салбар компанийн төлөөллүүдийн хамт өнөөдөр ОБЕГ-ын удирдлагуудтай уулзаж хандивт нэгдэж байгаа тухайгаа хэлж хэрхэн хамтарч ажиллахаа зөвлөлдлөө.Энэ үеэр зудын нөхцөл байдлын талаар, малын хорогдол тав хоногийн өмнөх мэдээгээр 667 мянга байсан бол өнөөдөр 1 сая 552 мянгад хүрч огцом өссөн. Нөхцөл байдал сайжирч, цаг наашлахад хугацаа шаардлагатай байгаа гэх зэрэг цаг үеийн мэдээллийг ОБЕГ-ын Тэргүүн дэд бөгөөд штабын дарга, бригадын генерал Ж.Чүлтэмсүрэн, дэд дарга бригадын генерал Б.Ууганбаяр нар танилцуулав.Мөн энэ удаагийн зудын улмаас олон малчин өрх малгүй болж эхэлсэн. Энэ нь цаашдаа олон сөрөг үр дагавартай. Тиймээс малчдадаа туслах үйлсэд хувийн компанийн томоохон төлөөлөл оролцож байгаад талархал илэрхийлэв. Түүнчлэн тус группын мянга мянган ажилтанд ажлын амжилт хүслээ. Хандивын зарцуулалт, хуваарилалтыг ч ил тод зарлана гэв.

Хаваржилт хүндэрсэн аймаг, сумдад тусламж үзүүлэх зургаан бүлэг орон нутагт ажиллаж байна. ЗГХЭГ-ын дарга Д.Амарбаясгалангаар ахлуулсан шуурхай бүлэг Говь-Алтай аймгийн Баян-Уул, Жаргалан, Тайшир сумдад ажиллаж, өвс тэжээл, хүнсний багц, түлш түлээ, эмнэлгийн тусламж үйлчилгээ үзүүллээ.Өнгөрсөн оны арваннэгдүгээр сараас эхлэн орон даяар их хэмжээний хур тунадас орж, нутгийн 80 хувьд цасан бүрхүүл тогтоод байна. Говь-Алтай аймагт ч 1975 оноос хойш ажиглагдаагүй их хэмжээний хур тунадас орсон талаар малчид ярьж байна. Одоогоор тус аймгийн Дэлгэр, Баян-Уул, Жаргалан, Тайшир, Цээл, Чандмань, Шарга, Эрдэнэ, Есөнбулаг сумдад өвөлжилт “маш их эрсдэлтэй” гэсэн үнэлгээ гарчээ.Тухайлбал, тус аймгийн Баян-Уул суманд цасны зузаан нэмэгдсэнээс бог мал тамирдаж, хээл хаях хэмжээнд хүрсэн байна. Тус сумын 289 өрхөд тус бүр 15 шуудай тэжээл, хүнсний багц, түлш түлээ, эрүүл мэндийн тусламж хүргэлээ. Мөн Жаргалан сумын 214 өрх зудын нөхцөл байдалд байгаа гэсэн үнэлгээ гарсан байна. Тиймээс айл тус бүрд 15 шуудай хивэг тэжээл, шаардлагатай тусламжуудыг эхний ээлжинд шуурхай бүлэг хүргэж өглөө. Мөн Монгол Улсын Засгийн газар, УОК-ын шийдвэрээр Говь-Алтай аймгийн Бугат сумын ЗДТГ-т туулах чадвар сайтай автомашин олголоо. Цаашид нөхцөл байдалтай уялдуулан хоёрдугаар ээлжинд хүчит тэжээл, тэжээлийн будаа зэргийг олгох ажлыг зохион байгуулна.Одоогийн байдлаар Говь-Алтай аймгийн Бугат сумын Бугын даваа, Цээл сумын Цагаан голын хөндий, Есөнбулаг сумын Дөтийн даваа, Цогт сумын Дөтийн даваа, Төгрөг сумын Мааньтын даваа, Эрдэнэ сумын Замтын даваа, Жаргалан сумын Дунд замын даваа, Дарви сумын Улаан сайрын даваа зэрэг хаагдсан зам давааг онгойлгохоор бие бүрэлдэхүүн ажиллаж байна. Гэвч их хэмжээний цас, цасан шуургын нөхцөл байдлаас үүдэн сум хоорондын зам хүндрэлтэй хэвээр байна.Засгийн газраас Монгол банк болон арилжааны банкуудтай зөвшилцөж малчдын зээлийн эргэн төлөлт, хүүгийн төлөлтийг зудын хүндэрсэн нөхцөл байдал дуустал түр хойшлуулахаар болсон. Өвлийн их хэмжээний цас нь мал, малчин хоёрыг тамирдуулж, зудын нэн хүнд нөхцөлд хаваржиж байгаа учир зээл төлөлтийг түр хугацаанд хойшлуулж байгаад талархалтай байгаагаа малчид илэрхийллээ.   

Цаг агаар:Өнгөрсөн хоногт: Нийт нутгаар цаг агаар тогтуун, шөнөдөө Дархадын хотгор, Хөвсгөлийн уулархаг нутаг, Завхан голын эх, Идэр, Тэс, Байдраг, Туул, Тэрэлж, Хэрлэн голын хөндийгөөр -38...-43 градус, Увс нуурын хотгор, Хангай, Хэнтийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Онон, Улз, Халх голын хөндийгөөр -34...-39 градус, Их нууруудын хотгор, Алтайн уулархаг нутгаар -23...-28 градус, говийн бүс нутгийн өмнөд хэсгээр -17...-22 градус, бусад нутгаар -28...-33 градус байлаа.Өнөөдөр: Нутгийн өмнөд хэсгээр үүлэрхэг, говийн бүс нутгийн өмнөд хэсгээр цас орж, явган шуурга шуурна. Баруун аймгуудын нутгаар баруун өмнөөс секундэд 7-12 метр, бусад нутгаар баруун хойноос секундэд 3-8 метр. Бусад нутгаар багавтар үүлтэй, цас орохгүй. өдөртөө Дархадын хотгор, Тэс голын хөндийгөөр -28...-33 градус, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Эг, Үүр, Ерөө, Тэрэлж, Хэрлэн, Халх голын хөндийгөөр -20...-25 градус, Их нууруудын хотгор, говийн бүс нутгийн өмнөд хэсгээр -11...-16 градус, бусад нутгаар -16...-21 градус хүйтэн байна.Улаанбаатар хотод: Багавтар үүлтэй. Цас орохгүй. Салхи баруун хойноос секундэд 3-8 метр. Шөнөдөө Яармаг-Сонгины орчмоор -39...-41 градус, бусад хэсгээр -31...-33 градус, өдөртөө -18...-20 градус хүйтэн байна.Гал түймэр: Объектын түймэр:- Улаанбаатар хот, Хан-Уул дүүрэг. 11 дүгээр хороо, “Хөдөө Аж Ахуйн Их сургууль”-ийн оюутны дотуур байрны гадна хогийн цэгт хог шатаж байна гэсэн дуудлагыг 02.20-ны өдрийн 19:26 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 14 дүгээр ангийн алба хаагчид 5 км замыг туулан 19:34 цагт очиход 2х6 метрийн хэмжээтэй хогийн цэгт хог шатаж байсныг 5 минут ажиллаж унтраасан.- Улаанбаатар хот, Сүхбаатар дүүрэг. 16 дугаар хороо, 30 дугаар гудамжинд байшин шатаж байна гэсэн дуудлагыг 02.20-ны өдрийн 11:24 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 34 дүгээр ангийн алба хаагчид 3 км замыг туулан 11:29 цагт очиход иргэн Ж-ийн 6х8 метрийн хэмжээтэй байшингийн дээврийн хэсэг шатаж байсныг 15 минут ажиллаж унтраасан.- Улаанбаатар хот, Сонгинохайрхан дүүрэг. 3 дугаар хороо, Баганарангийн 15 дугаар гудамжинд байшин шатаж байна гэсэн дуудлагыг 02.20-ны өдрийн 12:31 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчид 6 км замыг туулан 12:38 цагт очиход иргэн Н-ийн 8х8 метрийн хэмжээтэй байшингийн, 2х2 метрийн хэмжээтэй гал тогооны өрөө, 1х2 метрийн хэмжээтэй галлагааны өрөөний дээвэр тус тус шатаж байсныг 30 минут ажиллаж унтраасан.- Улаанбаатар хот, Сонгинохайрхан дүүрэг. 41 дүгээр хороо, Зээлийн 20 дугаар гудамжинд автомашин шатаж байна гэсэн дуудлагыг 02.20-ны өдрийн 12:42 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 29 дүгээр ангийн алба хаагчид 3 км замыг туулан 12:49 цагт очиход иргэн Б-ийн “Тоёота Спасио” загварын суудлын автомашин шатаж байсныг 10 минут ажиллаж унтраасан.- Улаанбаатар хот, Налайх дүүрэг. 1 дүгээр хороо, Хөх давааны-Энгэр гэдэг газар байшин шатаж байна гэсэн дуудлагыг 02.20-ны өдрийн 12:55 цагт /13:05/ хүлээн авсан.Тус дүүргийн Онцгой байдлын хэлтсийн Гал түймэр унтраах, аврах 28 дугаар ангийн алба хаагчид 16 км замыг туулан 13:15 цагт очиход иргэн Б-ийн 6х10 метрийн хэмжээтэй байшин шатаж байсныг 1 цаг 9 минут ажиллаж унтраасан.- Сэлэнгэ аймаг, Мандал сум. Баян-Арцат багийн Энхтайваны гудамжинд байшин шатаж байна гэсэн дуудлагыг 02.21-ний өдрийн 02:28 цагт хүлээн авсан. Тус аймгийн Онцгой байдлын газрын Мандал сум дахь Онцгой байдлын хэлтсийн Гал түймэр унтраах, аврах 19 дүгээр ангийн алба хаагчид 2.5 км замыг туулан, 02:33 цагт очиход иргэн Я-ийн 17х8 метрийн хэмжээтэй байшингийн дээврийн хэсэг шатаж байсныг 1 цаг 21 минут ажиллаж унтраасан. Тус гал түймэрт иргэн Я/71 настай, эрэгтэй/ хөнгөн түлэгдэлтэй, О/67 настай, эмэгтэй/ хүндэвтэр түлэгдсэнийг эмнэлэгт хүргэсэн. - Улаанбаатар хот, Сонгинохайрхан дүүрэг. 1 дүгээр хороо, Толгойтод гал гарч байна гэсэн дуудлагыг 02.21-ний өдрийн 05:22 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчид 9 км замыг туулан 05:39 цагт очиход Э-ын 9х7 метрийн хэмжээтэй байшингийн дээврийн хэсэг шатаж байсныг 30 минут ажиллаж унтраасан. Хүний үйл ажиллагаатай холбоотой осол. Төөрсөн, сураггүй болсон: Хөвсгөл аймаг, Галт сум. Зүрх багийн Соёмбот хорооллын 317 тоот /аймгийн төвөөс урд зүгт 167 км, сумын төвд/ 02.15-ны өдрийн 17:00 цагийн орчим иргэн М/30 настай, эрэгтэй/ явганаар гараад сураггүй болсон, эрэн хайх ажиллагаанд дэмжлэг үзүүлнэ үү гэсэн хүсэлтийг аймгийн Цагдаагийн газраас 02.20-ны өдрийн 15:11 цагт хүлээн авсан. Тус аймгийн Онцгой байдлын газрын Галт сум дахь Гал түймэр унтраах, аврах 76 дугаар ангийн алба хаагчид , сумын Цагдаагийн хэсгийн 2 алба хаагчтай хамтран 15:49 цагаас эрэн хайх ажиллагааг Галт сумын төвд байрлах 10 айл, эзэнгүй 18 хашаа, байшин, сумын төвөөс зүүн урд зүгт 4 км-т Галт багийн “Хамрын-Ам” гэдэг газар хүртэл зохион байгуулж 17:58 цагт зогсоосон. 02.21-ний өдрийн 09:00 цагт эхлүүлсэн. Цас шаварт суусан: Баянхонгор аймаг, Бууцагаан сум. Тэмээт багийн "Хөтөл-Ус" гэдэг газар /аймгийн төвөөс баруун 172 км, сумын төвөөс зүүн зүгт 8 км/-т  хоёр автомашин цасанд суусан тухай дуудлагыг 02.20-ны өдрийн 21:34 цагт хүлээн авсан. Тус аймгийн Онцгой байдлын газрын Гал түймэр унтраах, аврах 72 дугаар ангийн алба хаагчид 8 км замыг туулан 22:27 цагт очиж иргэн З-ын  “Портер” загварын ачааны автомашин, иргэн Б-ын “Тоёота Королла” загварын суудлын автомашин цасанд суусан байсныг 28 минут ажиллаж татан гаргасан.Баянхонгор аймаг, Өлзийт сум. Байн хөндий багийн "Их хүрэн толгой" гэдэг газар /аймгийн төвөөс зүүн урд 65 км, сумын төвөөс урд зүгт 45 км/-т суудлын автомашин /1 зорчигчтой/ цасанд суусан тухай дуудлагыг 02.20-ны өдрийн 21:29 цагт хүлээн авсан. Тус аймгийн Онцгой байдлын газрын Гал түймэр унтраах, аврах 16 дугаар ангийн алба хаагчид  65 км замыг туулан 23:50 цагт очиж иргэн Б-ийн  “Рав-4” загварын суудлын автомашин /1 зорчигчтой/ цасанд суусан байсныг 20 мин ажиллаж татан гаргасан.Говьсүмбэр аймаг, Баянтал сум. Их-Уул багийн “Хонгорын-Энгэр” гэдэг газар /аймгийн төвөөс баруун зүгт 42 км, сумын төвөөс баруун зүгт 6 км/ суудлын автомашин цасанд суусан тухай дуудлагыг 02.21-ний өдрийн 01:00 цагт хүлээн авсан. Тус аймгийн Онцгой байдлын газрын Онцгой байдлын газрын Эрэн хайх, аврах бүлгийн алба хаагчид 42 км замыг туулан 02:01 цагт очиж иргэн М-ийн  “Ниссан Экстрайл” загварын автомашин цасанд суусан байсныг 40  минут ажиллаж татан гаргасан.ОНЦГОЙ БАЙДЛЫН ЕРӨНХИЙ ГАЗАР 

Монгол Улсын Ерөнхийлөгчийн санаачилгаар “Тэрбум мод” үндэсний хөдөлгөөнийг уур амьсгалын өөрчлөлт, цөлжилт, газрын доройтлыг бууруулах зорилготойгоор 2021 оноос эхлэн орон даяар хэрэгжүүлж эхлээд байгаа билээ. Эх дэлхий, байгаль орчноо хайрлан зохицон амьдрах монгол уламжлал, зан заншлаа эрхэмлэн, дэлхийн уур амьсгалын өөрчлөлтийн нөлөөллийг бууруулах, ой, усны нөөцийг хамгаалж, нэмэгдүүлэх экологийн тэнцвэрт байдлыг хангах зорилгоор "Тэрбум мод" үндэсний хөдөлгөөнийг санаачлан хэрэгжүүлэхийг чиглэл болгосон. Байгаль орчныг хамгаалах, нөхөн сэргээх, ойжуулах, мод тарих, уур амьсгалын өөрчлөлт, цөлжилттэй тэмцэх нийгмийн шинж чанартай бичил төсөл хөтөлбөрүүдийг сонгон шалгаруулж, дэмжих зорилгоор Ойн газраас “Төсөл сонгон шалгаруулах хөтөлбөр”-ийн удирдамжийг нээлттэй зарлаж байна.ТӨСЛИЙН ЗОРИЛТ, ҮЙЛ АЖИЛЛАГААНЫ ЧИГЛЭЛ:Дараах зорилт, үйл ажиллагааны хүрээнд төсөл сонгон шалгаруулна. - Хашаандаа мод тарьж ургуулсан туршлагатай, цаашид мод бут сөөгийн тарьц суулгац ургуулах сонирхолтой байх;- Өөрийн амьдарч буй гудамж, хороо, дүүргийн айл өрхөд мод тарьж, ургуулах, арчлах талаар мэдээ мэдээллийг өгөх;- Айл өрхүүдийг хашаандаа мод тарьж, ургуулах, арчлан хамгаалах, амьдрах орчноо сайжруулахад татан оролцуулах;Уг төслөөс нийт 50 айл өрхийг сонгон шалгаруулна. Шалгарсан 1 айл өрхөд дараах дэмжлэгийг үзүүлнэ. Үүнд:- 4x8 хэмжээтэй (32м2 ) хүлэмж – 1 ширхэг - Хүлэмжид тарих мод сөөгийн үр- Сургалт, мэргэжил аргазүйн зөвлөгөө өгөхТӨСӨЛ СОНГОН ШАЛГАРУУЛЖ ДЭМЖЛЭГ ҮЗҮҮЛЭХЭД ТАВИГДАХ ШААРДЛАГА:Дэмжлэг хүссэн өргөдлийг, төслийн хамт ирүүлэх:Төсөлд дараах шаардлагыг тавина. Үүнд:- Төслийн зорилт зорилгод нийцсэн байх;- Үр ашигтай байх;- 0,07 га өмчилсөн газартай байх;- Хашаандаа тарьсан мод, бутыг арчилж хамгаалах, ургуулж байсан туршлагатай байх;- Өмчилсөн газарт хүлэмж байршуулах зай талбайтай байх; (4x8 хэмжээтэй хүлэмж)- Тухайн айл өрх нь тодорхой хэмжээнд мод, бут хашаандаа тарьсан байх;- Гудамж, хороо, дүүргийн айл өрхөд мод тарьж ургуулах арчлах талаар мэдээлэл өгөх; (30-аас доошгүй айл өрх)- Айл өрхүүдийг хашаандаа мод тарьж, ургуулах, арчлан хамгаалах, амьдрах орчноо сайжруулахад татан оролцуулсан байх (10-аас доошгүй айл өрх)ХАМРАХ ХҮРЭЭ:Хашаандаа мод тарьж, ургуулах хүсэл сонирхолтой Улаанбаатар хотын 9 дүүргийн айл өрх хамрагдана. ТӨСӨЛ ХҮЛЭЭН АВАХ ХУГАЦАА, ХАЯГ:Хугацаа: 2024 оны 02 дугаар сарын 01-нээс 2024 оны 03 дугаар сарын 01-ний хороонд бүртгүүлнэ. Хаяг: 2024 оны 03 дугаар сарын 01-ний өдрийн 17:00 цагаас өмнө [email protected] цахим хаягаар ирүүлнэ үү.ХОЛБОО БАРИХ ХАЯГ, ЛАВЛАХ УТАС: 51-264447; 77111178

Зам, тээврийн хөгжлийн яамны Төрийн нарийн бичгийн дарга С.Батболд  /2024.02.20/ ШУТИС-ийн Механик, тээврийн сургуулийн удирдлага, багш, оюутнуудтай уулзлаа.Уулзалтын үеэр зам, тээврийн салбарын хүний нөөцийг бэлтгэхэд хамтран ажиллаж, оюутнуудыг салбарын гадаад, дотоодын тэтгэлэгт идэвхтэй хамруулахад хамтран ажиллахаар тохирлоо.Мөн зам, тээврийн салбарын нэгдсэн платформд багш, оюутнуудын эрдэм шинжилгээний өгүүллийг тогтмол нийтэлж, салбарын статистик, цаг үеийн мэдээ мэдээллийг тогтмол солилцоно.Оюутнуудтай уулзахдаа зам, тээврийн салбарын үүсэл, хөгжил, өнөөгийн байдал, ирээдүйн хөгжлийн чиг хандлагыг танилцуулж, эх орныхоо тээврийн салбарын бүхий л бүтээн байгуулалтад хувь нэмрээ оруулахын тулд мэргэжилдээ эзэн болж, амжилттай суралцахыг хүслээ.Ташрамд дурдахад, ШУТИС-ийн Механик, тээврийн сургууль нь авто инженерчлэл, машин үйлдвэрлэл, нисэх техникийн механик, зүтгүүр, зүтгүүрийн аж ахуй, төмөр замын тээврийн удирдлага, зохион байгуулалт, логистикийн менежмент зэрэг мэргэжлээр боловсон хүчин бэлтгэж байна.

Булган аймгийн Баяннуур сумын ерөнхий боловсролын сургууль нь Шинэ Монгол эрдмийн хүрээлэнгээс хэрэгжүүлсэн менежментийн төслийн эхний 8 сургуулийн нэг юм. Төсөл хэрэгжсэнээр байгууллагын соёл, үйл ажиллагаа, сургалтын орчин нөхцөл, сургалтын чанарт эерэг өөрчлөлтүүд гарсан тухай орон нутгийн болон сургуулийн удирдлагууд ярилаа.Зудын нөхцөл байдалтай холбоотойгоор нийт 23 сурагч сар шинийн баярын дараа хичээлдээ ирэх боломжгүй болсон. Боловсрол, шинжлэх ухааны сайдаар ахлуулсан ажлын хэсэг 2 дугаар сарын 19-ний өдрөөс зам, давааг нээх ажлыг шуурхай эхлүүлж, 2-7 хоногийн дотор хүүхдүүдийг сургуульдаа явах боломжоор хангахаар төлөвлөж байна.Дотуур байр 50 хүүхдийн хүчин чадалтай, 71 хүүхэд амьдарч байгаа бөгөөд хүсэлт гаргасан 27 хүүхдийг хамруулах боломжгүй байна. Иймд 100 хүүхдийн дотуур байртай болох хүсэлтийг уламжиллаа.Тус сургууль нөхөн хангалтын зардлаараа 25 таблетыг шийдвэрлэсэн. 10 таблет EDUTEN платформыг хэрэгжүүлэхэд 15 таблетыг PEARSON платформ дээр ашиглаж байна. Дотуур байрын сурагчидтай уулзахад EDUTEN платформыг ашиглан суралцах нь илүү сонирхолтой байдаг талаар ярьж байлаа.Цэцэрлэгийн хувьд 130 хүүхэд бүртгэлтэй. Цас зуд ихтэй, хүйтний эрч чангарч байгаатай холбоотойгоор хүүхдийн ирц бага байгаа ч хичээл сургалтын үйл тасралтгүй үргэлжилж байна. Энэ жилээс Амьдралын мод хөтөлбөрийг хэрэгжүүлж эхэлсэн. Ангиудад ухаалаг дэлгэц хэрэгтэй байгаа талаар цэцэрлэгийн эрхлэгч танилцууллаа.

Жендэрийн үндэсний хорооны Ажлын албанаас санаачлан Жендэрийн эрх тэгш байдлыг хангах салбар дундын стратеги төлөвлөгөө /2022-2031/-г хэрэгжүүлэх, Хорооны гишүүдийн хамтын ажиллагааг дэмжих, харилцан мэдээлэл солилцох зорилго бүхий “Хорооны гишүүний цаг” “ТОГТМОЛ” уулзалтыг зохион байгуулж байна.Ээлжит цахим уулзалт 2024 оны 02 дугаар сарын 20-ны өдөр зохион байгуулагдаж, Монгол Улсын Төрийн албаны зөвлөлийн гишүүн Б.Пүрэвдагва: Төрийн албан дахь жендэрийн эрх тэгш байдлын баталгааны хэрэгжилт, шатлан дэвших тогтолцоо ба жендэрийн тэгш нөхцөл, боломжийн талаар танилцуулж, Төрийн албан хаагчдын эрх ашгийг хамгаалах, ажлын байрны бэлгийн дарамт, ялгаварлан гадуурхалт, хөдөлмөрлөх эрх зөрчигдөхөөс урьдчилан сэргийлэх чиглэлээр  Хорооны гишүүдтэй хамтран ажиллах саналтай байна гэв.Танилцуулгатай холбогдуулан Жендэрийн үндэсний хорооны Нарийн бичгийн дарга бөгөөд Ажлын албаны дарга Т.Энхбаяр: Жендэрийн бие даасан мэргэжилтний албан тушаалын тодорхойлолт, төрийн албаны ерөнхий шалгалтын агуулгын талаар; Хүний эрхийн үндэсний комиссын дарга Д.Сүнжид: Жендэрийн эрх тэгш байдлыг хангах тухай хуулийн 10 дугаар зүйлийн хэрэгжилтийг хэрхэн хангаж ажиллах талаар; Удирдлагын академийн захирал Д.Сүрэнчимэг: Төрийн албан хаагчийн ёс зүйн тухай хуулийн талаар тус тус асуулт асууж, хариулт авлаа.Монголын Үндэсний Худалдаа Аж Үйлдвэрийн Танхимын Ерөнхийлөгч Д.Энхтүвшин: 2024 оны онцлох үйл ажиллагаа болон бизнес эрхлэлт дэх жендэрийн эрх тэгш байдлын талаар танилцуулж, 2019 оноос хойш “Шилдэг аж ахуйн нэгжийн шалгаруулалт-д жендэрийн эрх тэгш байдлын шалгуур үзүүлэлтийг тусган хэрэгжүүлж байгааг онцолсон юм.Танилцуулгатай холбогдуулан Хүчирхийллийн эсрэг үндэсний төвийн захирал Н.Арвинтариа: Хүчирхийлэлд өртсөн эмэгтэйчүүдийн хөдөлмөр эрхлэлтийг дэмжих, тэдний бүтээгдэхүүн үйлчилгээг зах зээлд борлуулахад дэмжлэг үзүүлж хамтран ажиллах боломжтой эсэх талаар; Жендэрийн үндэсний шинжээчдийн бүлгийн ахлагч Д.Сүхжаргалмаа: Гар урлалын бүтээгдэхүүний зах зээлийг хөгжүүлэх, өргөжүүлэх зорилгоор цаашид авч хэрэгжүүлэх арга хэмжээний талаар асуулт асууж, хариулт авлаа.

Прокурорын байгууллага 2024 оны 2 дугаар сарын 12-ноос 16-ны өдрүүдэд 112 хэрэгт яллах дүгнэлт үйлдэн шүүхэд шилжүүлж шийдвэрлэлээ.Тодруулбал, Эрүүл мэндийн халдашгүй байдлын эсрэг 83, Өмчлөх эрхийн эсрэг 19, Хөдөлгөөний аюулгүй байдал, тээврийн хэрэгслийн ашиглалтын журмын эсрэг 5, Хүний бэлгийн эрх чөлөө, халдашгүй байдлын эсрэг 3, Авлига, албан тушаалын болон Хүний амьд явах эрхийн эсрэг, Хүрээлэн байгаа орчны эсрэг тус бүр 2, Галт зэвсэг, галт хэрэгсэл, тэсэрч дэлбэрэх бодис хууль бусаар эзэмших 1 хэргийг тус тус шүүхэд шилжүүлсэн байна.Яллах дүгнэлт үйлдэн шүүхэд шилжүүлсэн зарим хэргээс дурдвал:Нийслэлийн прокурорын газраас Увс аймгийн Өмнөговь сумын Засаг дарга С.Ө, Засаг даргын орлогч Х.Д, Иргэдийн төлөөлөгчдийн хурлын төлөөлөгч, тэргүүлэгч Х.Д, Ц.Б, Н.Б нарын 11 албан тушаалтан эрх мэдэл, албан тушаалын байдлаа урвуулан “Ш” ХХК-тай нөхөн сэргээлт хийх гэрээ байгуулж, гүйцэтгэх ёсгүй үйлдлийг хийсний хариуд хахууль авсан гэх хэрэгт Эрүүгийн хуулийн 22.4 дүгээр зүйлийн 4 /Нийтийн албан тушаалтан хахууль авах/, 22.5 дугаар зүйлийн 2 /Хахууль өгөх/-т зааснаар яллах дүгнэлт үйлдэн Увс аймаг дахь сум дундын эрүүгийн хэргийн анхан шатны шүүхэд;Иргэн Д.Г, Т.З нар нь ашиг хонжоо олох зорилгоор насанд хүрээгүй Т.А-ийн эмзэг байдлыг далимдуулж эрхшээлдээ оруулан биеийг нь үнэлүүлж, хүн худалдаалсан гэх хэрэгт Эрүүгийн хуулийн 13.1 дүгээр зүйлийн 2.1 /Хүн худалдаалах/-т зааснаар яллах дүгнэлт үйлдэн Баянзүрх дүүргийн эрүүгийн хэргийн анхан шатны шүүхэд,Баянзүрх дүүргийн прокурорын газраас иргэн Б.А нь байлдааны зориулалттай галт зэвсгийг хууль бусаар хадгалж, худалдан борлуулахаар завдсан гэх хэрэгт Эрүүгийн хуулийн 20.4 дүгээр зүйлийн 1 /Галт зэвсэг, галт хэрэгсэл, тэсэрч дэлбэрэх бодис хууль бусаар эзэмших/-д зааснаар яллах дүгнэлт үйлдэн Баянзүрх дүүргийн эрүүгийн хэргийн анхан шатны шүүхэд тус тус шилжүүллээ.