НИЙГЭМ

Улаанбаатар хотод их багтаамжийн нийтийн тээврийн хэрэгсэл метро барих төслийн барилга угсралтын гүйцэтгэгчийг сонгон шалгаруулах I шатны тендерийг товлосон хугацаандаа буюу өнөөдөр зарлалаа. Хамгийн сүүлд метро барих төслийн ажлын хэсгийн хуралдаан есдүгээр сарын 30-нд болж, метроны техникийн тодорхойлолтыг баталж, Тендерийн үнэлгээний хороо руу шилжүүлээд байсан юм. Харин их багтаамжийн нийтийн тээврийн хэрэгсэл метро барих төслийн зөвлөх үйлчилгээг БНСУ-ын Сөүл хотын метрог барьсан “Духуа инженеринг” компани үзүүлж байгаа билээ.Улаанбаатар метроны шугам ойролцоогоор 17.7км урттай. Толгойтоос Амгалан хүртэл үргэлжлэх бөгөөд нийт аяллын хугацаа 27 минут байна. Өргөгдсөн болон газар доорх 14 өртөө зогсоолтой. Зогсоол хоорондын зай 1.3 км. Зорчигч тээвэрлэх чадвар оргил ачааллын үед нэг цагт нэг чигт 17 мянгаас 26 мянган хүн тээвэрлэнэ. Мөн ил, далд инженерийн байгууламжууд хийж, метроны 14 өртөө зогсоолыг худалдаа, үйлчилгээний цэг байдлаар хөгжүүлэхээр төлөвлөжээ. Метроны барилга угсралтын ажлыг 2025 онд эхлүүлэх юм.НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

Монгол Улсын Их Хурлын дарга Д.Амарбаясгалан Шинжлэх ухаан, технологийн их сургуулийн түүхэн 65 жилийн ой, Монголын багш нарын 58 дахь өдрийн арга хэмжээнд өнөөдөр (2024.10.03) оролцож, Монгол Улсын Их Хурлын өмнөөс болон тус сургуулийн төгсөгчийн хувиар мэндчилгээ дэвшүүллээ.ШУТИС нь үүсэн байгуулагдсан 65 жилийн хугацаандаа инженер, технологи, менежмент, бизнес, нийгэм, хүмүүнлэгийн чиглэлээр 100 мянга гаруй мэргэжилтнийг бэлтгэжээ.Политехникийн дээд сургууль, Монгол Улсын техникийн их сургууль улмаар Шинжлэх ухаан, технологийн их сургууль болон өргөжсөн түүхэн хөгжлийн үе шат бүрдээ боловсрол, шинжлэх ухааны салбарт манлайлан, инновац, технологи, шинэ мэдлэгийг бий болгон, улс орныхоо хөгжил дэвшилд бодитой хувь нэмэр оруулж ирснийг УИХ-ын дарга тодотгов. Түүнчлэн инновац бүтээх, инновацад суурилсан, стартап компани, шинэ бүтээлийг оюутан залуучуудын мэдлэгт суурилж бий болгох, энэ мэдлэгээ үйлдвэрлэл, үйлчилгээнд нэвтрүүлэхэд Шинжлэх ухаан, технологийн их сургууль манлайлан ажиллах шаардлагатай гэлээ.Цаашид Монгол Улсын хэмжээнд төлөвлөж буй мега төслүүдийг хэрэгжүүлэхэд инженер, технологийн мэргэжилтнүүдийн эрэлт хэрэгцээ улам нэмэгдэхээр байна. Тиймээс ШУТИС эдийн засгийн томоохон төслүүдийн хүний нөөцийг бэлтгэх чухал үүрэгтэй учраас УИХ-аас шинжлэх ухаан, технологи, инновацыг дэмжсэн хууль, эрх зүйн орчны дэвшилтэт бодлогын шинэчлэлийг цаг алдалгүй хийнэ гэдгийг УИХ-ын дарга Д.Амарбаясгалан мэндчилгээндээ онцоллоо.УИХ-ын дарга Д.Амарбаясгалан ШУТИС-ийн 65 жилийн ойн өдөр хөдөлмөр зүтгэлээрээ улс орныхоо хөгжил цэцэглэлтэд үнэтэй хувь нэмрээ оруулсан эрдэмтэн, багш нарт төрийн дээд одон медаль гардууллаа.ШУТИС-ийн Мэдээлэл, технологийн сургуулийн профессор Б.Зоригтбаатарт Хөдөлмөрийн гавьяаны улаан тугийн одон, ШУТИС-ийн Гадаад хэлний сургуулийн ахмад багш Б.Мөнхбаатар, ШУТИС-ийн Ректорын ажлын албаны ахмад мэргэжилтэн Х.Отгон-Эрдэнэ нарт Алтан гадас одон, ШУТИС-ийн Барилга, архитектурын сургуулийн тэнхмийн эрхлэгч Н.Болдбаатар, ШУТИС-ийн Хүний нөөцийн албаны ахлах мэргэжилтэн А.Сүнжидмаа нарт Хөдөлмөрийн хүндэт медаль гардуулан баяр хүргэлээ хэмээн Улсын Их Хурлын Хэвлэл мэдээллийн газраас мэдээллээ.

Өнөөдрийн байдлаар дараах гурван байршилд зам засварын ажил үргэлжилж байна. Тодруулбал, Худгийн гудамжны авто замаас “Хангай” хотхон хүртэлх авто замыг өчигдөр буюу аравдугаар сарын 1-ний 22:00 цагаас хаасан. Авто замын хөдөлгөөнийг аравдугаар сарын 4-ний 06:00 цагт нээнэ.Чингэлтэй дүүргийн 7, 8 дугаар хороо, Тасганы овооны уулзвараас 7 дугаар хорооны уулзвар хүртэлх авто замыг өчигдөр буюу аравдугаар сарын 1-ний 22:00 цагаас хаасан бөгөөд аравдугаар сарын 4-ний өдрийн 06:00 цагт нээх юм.Таван шарын нүхэн гарцын ажилтай холбоотойгоор Товчооны зам буюу “Энхжин” худалдааны төв орчмын авто замыг өчигдөр буюу аравдугаар сарын 1-ний 22:00 цагаас хаасан. Авто замыг 4-ний 06:00 цаг хүртэл хэсэгчлэн хааж, шинэчилж байна. Энэ хүрээнд буцах эргэлт хийх юм. Зам засварын ажлын хүрээнд инженерийн шугам сүлжээний худгийн тагийг асфальт бетон хучилтын түвшинд тааруулах, хашлага солих, тэмдэг тэмдэглэгээ хийх зэрэг ажлыг гүйцэтгэж буй. Иймд иргэд, жолооч та бүхэн бусад замыг сонгон хөдөлгөөнд оролцоно уу.НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

Монгол Улсын 330 сум, нийслэлийн хороо бүрийн нэг шилдэг төгсөгчийг шалгаруулж, дэлхийн нэр хүнд бүхий их, дээд сургуульд суралцуулах “Ерөнхийлөгчийн илгээлт-2100” тэтгэлэгт хөтөлбөрийн 2024 оны бэлтгэл хөтөлбөрийн эзэд тодорлоо.Боловсролын үнэлгээний төв болон Улсын бүртгэлийн ерөнхий газрын мэдээллийн санг ашиглан журмын шалгуурыг хүний оролцоогүйгээр шалган,  болзол хангасан сум, хороо бүрийн шилдэг төгсөгчдийн жагсаалтыг Боловсролын үнэлгээний төв гаргадаг.Автоматаар шүүж гаргасан шилдэг төгсөгчдийн жагсаалтыг Нийслэлийн боловсролын газар болон аймгуудын Боловсрол, шинжлэх ухааны газраар баталгаажуулан ирүүлсэн Боловсролын яамны 1/1289 тоот албан бичгийг үндэслэн нийт 338 хүүхдийн нэрийг зарлаж байна.“Монгол Улсын Ерөнхийлөгчийн нэрэмжит сургалтын тэтгэлэг олгох журам”-д 2024 онд өөрчлөлт орсон.Болзол хангасан суралцагч төрийн өмчийн их, дээд сургуулийн бэлтгэл хөтөлбөрт элсэн суралцаж, ерөнхий эрдмийн болон гадаад хэлний бэлтгэл хийнэ.Мөн харилцааны чадвар, албан бичгийн чадвар, суралцах орны соёл, нийгмийн хариуцлага, олон нийтийн ажил зэрэгт сургаж бэлтгэх юм.Бэлтгэл хөтөлбөрийг амжилттай төгссөн суралцагчид бэлтгэл хөтөлбөрийн сурлагын амжилт, болзол хангасан байдлаас хамааран аль улсын ямар их сургуульд сурах нь шийдэгдэнэ.Тэтгэлэгт хөтөлбөрт тэнцсэн хүүхэдтэй бэлтгэл хөтөлбөрийг зохион байгуулах их, дээд сургуулиуд холбогдож зааварчилгаа мэдээлэл өгнө.Жагсаалтад багтсан хүүхдүүд дараах хаяг, утсаар холбогдож мэдээлэл авах боломжтой.МУИС-ийн Хичээлийн II байр, өргөтгөл 307 тоот. 99949945, 99889379Монгол Улсын Ерөнхийлөгчийн зарлигийн дагуу Засгийн газрын баталсан “Ерөнхийлөгчийн нэрэмжит тэтгэлгийн журам”-тай энд дарж танилцана уу.    

Сонгинохайрхан дүүргийн 34 дүгээр хороонд 10 га талбайд 2007 айлын орон сууцны хороолол барих бэлтгэл ажлыг хангаж байна. Тодруулбал, 2024 оны нэгдүгээр сард орон сууцыг барих нээлттэй тендерийг зарлаж, барилгын ерөнхий гүйцэтгэгчээр БНСУ-ын “Ил Сүнг” ХК шалгарсан.Тус хороолол нь сургууль, цэцэрлэгийн цогцолбортой бөгөөд 1-3 өрөө эрчим хүчний хэмнэлттэй, орлогод нийцсэн нийт 14 ширхэг 10 давхар орон сууц барих юм. Тэгвэл уг орон сууцны хорооллыг 2027 оны III улиралд ашиглалтад оруулахаар ажиллаж байна. Энэ талаар нийслэлийн Орон сууцны бодлогын газрын дарга Г.Ганхүүгээс тодрууллаа.Тэрбээр “НЗДТГ-аас Сонгинохайрхан дүүргийн 34 дүгээр хороонд 2007 айлын орон сууцны төслийг БНСУ-ын Засгийн газрын хөнгөлөлттэй зээлийн хүрээнд барихаар бэлтгэж байна. Энэ нь 1-3 өрөө орон сууц, 960 хүүхдийн сургууль, 240 хүүхдийн цэцэрлэгийн цогцолбортой иж бүрэн хороолол юм. Толгойт дэд төвийн газар чөлөөлтөд энэ орон сууцуудыг ашиглана” гэж хэллээ.Баянголын ам нь Улаанбаатар хотын шинэ суурьшлын бүсийн нэг бөгөөд 450 га газарт 75 мянган хүн ам оршин суух хэсэгчилсэн ерөнхий төлөвлөгөө гарсан байдаг. Харин дэд бүтцийн хувьд 30 мянган хүн ам төвлөрөхөд зориулагдсан хүчин чадалтай юм.

Энэ онд Улаанбаатар хотод их багтаамжийн нийтийн тээврийн хэрэгсэл метро барих төслийн зөвлөх үйлчилгээний олон улсын нээлттэй тендерийг хоёр үе шаттай зохион байгуулж, БНСУ-ын “Духуа инженеринг” компанийн түншлэл шалгарсан. Тэгвэл аравдугаар сарын 3-нд метро барих барилга угсралтын гүйцэтгэгчийг сонгон шалгаруулах I шатыг зарлана. Энэ хүрээнд  ажлын хэсгийн хуралдаан болж, метроны техникийн тодорхойлолтыг Тендерийн үнэлгээний хороонд шилжүүлээд байна.Энэ үеэр нийслэлийн Засаг даргын нэгдүгээр орлогч Н.Мандуул “Их багтаамжийн нийтийн тээврийн хэрэгсэл метро барих төслийн зөвлөх үйлчилгээг Солонгосын Сөүл хотын метрог барьсан “Духуа инженеринг” ХК үзүүлж байна. Метро барих төслийн ажлын хэсгийн хуралдаанаар техникийн тодорхойлолтыг баталж, Тендерийн үнэлгээний хороо руу шилжүүллээ. Ингэснээр аравдугаар сарын 3-нд барилга угсралтын эхний шатны гүйцэтгэгчийг зарлана” гэсэн юм.Улаанбаатар хотын метро Толгойтоос Амгалан хүртэл 18 орчим км үргэлжлэх бөгөөд 14 зогсоолтой. Зогсоол хоорондын зай 1.3 км. Цагт 17500 зорчигч тээвэрлэнэ. Нийт аяллын хугацаа 27 минут байхаар төлөвлөгдсөн. Мөн ил, далд инженерийн байгууламжууд хийж, метроны 14 зогсоолыг худалдаа, үйлчилгээний цэг байдлаар хөгжүүлэх эхний ээлжийн техникийн тодорхойлолтыг гаргажээ. Улмаар барилга угсралтын ажлыг 2025 онд эхлүүлэх юм.НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

Улсын хэмжээнд өнгөрсөн долоо хоногт /2024.09.23-29/ нийслэлийн  8 дүүрэг, 18 аймгийн 29 суманд аюулт үзэгдэл, ослын  78 удаагийн дуудлага бүртгэгдлээ.Дуудлагын дагуу төв, орон нутгийн Онцгой байдлын байгууллагын алба хаагчид үүрэг гүйцэтгэж, найман иргэний амь насыг авран хамгааллаа.Нийт дуудлагын 56 нь гал түймэр, 13 нь хүний үйл ажиллагаатай холбоотой осол, ес нь ус цаг уурын гаралтай аюулт үзэгдэл байна.

Энэ долоо хоногт нийт 11.4 км авто замыг шинэчлэхээр төлөвлөсөн. Гэсэн ч цаг агаарын нөхцөл байдлаас шалтгаалж энэ амралтын өдрүүдэд зарим байршлын авто замын засвар, шинэчлэлийн ажлыг хойшлуулж буй талаар албаны хүнээс тодрууллаа.Нийслэлийн Замын хөгжлийн газрын дарга Б.Одбаяр "Өнөөдөр буюу есдүгээр сарын 27-ны өдөр хааж, шинэчлэх байсан Хувьсгалчдын гудамж, Богд уулын арын авто зам болон Чингисийн өргөн чөлөө гудамжны авто замын хэсэгчилсэн засвар шинэчлэлт цаг агаарын нөхцөл байдлаас үүдэн тодорхойгүй хугацаагаар хойшиллоо.  Асфальт бетон хучилтыг газар хуурай үед хийдэг учраас газар бүрэн хатсаны дараа ажлыг эхлүүлнэ. Харин “Нийслэл хүрээ” өргөн чөлөөний авто замын хэсэгчилсэн засвар, шинэчлэлт буюу Тэмээтэй хөшөөнөөс зүүн тийш И-Март дэлгүүрийн уулзвар хүртэлх замын ажлыг есдүгээр сарын 27-ноос 28-нд шилжих шөнө дуусгахаар төлөвлөж байна" гэлээ.

Сэлбэ дэд төвийг түшиглэн гэр хорооллыг орон сууцжуулах төсөл Сүхбаатар дүүргийн 14, Чингэлтэй дүүргийн 14, 18 дугаар хороонд хэрэгжиж буй. Тус төслийн 13 га газарт баригдах орон сууцны барилга угсралтын хоёр багц ажилд нийт дөрвөн компани тендерийн материалаа ирүүлж, тендерийг есдүгээр сарын 24-нд нээсэн билээ. Эхний багцын тендерт “Хунан индастриал экүйпмэнт инсталэйшн”, “Бодьпропертийз” компани материал ирүүлсэн. Харин хоёр дахь багцад “Чайна констракшн Континэнт энд Өүшн Монголиа” болон “Хунан индастриал экүйпмэнт инсталэйшн компани” материал өгсөн. Тэгвэл энэхүү олон улсын нээлттэй тендерийн гүйцэтгэх компанийг сонгон шалгаруулах тендерийн үнэлгээний хорооны анхны хуралдаан өнөөдөр боллоо.  “Сэлбэ” дэд төвийн тендерийн үнэлгээний хорооны дарга Н.Мандуул “Бид олон улсын жишгийн дагуу нээлттэй тендер зарласан. Хүний нөөцийн чадавх сайтай, туршлагатай, дэлхийн шилдэг компаниуд оролцох боломжийг бүх талаар нээж өгсөн” гэдгийг онцоллоо. Сэлбэ дэд төв Чингэлтэй болон Сүхбаатар дүүргийн нийт дөрвөн хорооны газар нутгийг хамаарах бөгөөд төсөл 2028 онд хэрэгжиж дуусахаар төлөвлөсөн. Үр дүнд нь сургууль, цэцэрлэг, эмнэлэг зэрэг нийгмийн суурь хэрэгцээг бүрэн хангасан 12 мянган айлын орон сууц бүхий хотхон хороолол баригдахаас эхний ээлжийн буюу энэхүү 13 га талбайн тендерийн үр дүнд хоёр талбайд нийт 18 блок орон сууцны барилга барих юм.

Парламентад суудалтай бүх намын төлөөллийг оролцуулан хүний эрх, нийгмийн хамгаалал, хөдөө аж ахуй, дэд бүтэц, төрийн байгуулалт зэрэг тухайлсан салбаруудын эрх зүйн орчныг боловсронгуй болгож, хууль тогтоомжийн хэрэгжилтийг эрчимжүүлэх чиг үүрэг бүхий 54 ажлын хэсгийг Улсын Их Хурлын даргын захирамжаар байгуулсан. Ажлын хэсгүүдийн өргөтгөсөн хуралдаан, хэлэлцүүлэг, санал солилцох уулзалтууд үргэлжилж байна. Өнгөрсөн хугацаанд Улсын Их Хурлын гишүүн, Ёс зүй, дэгийн байнгын хорооны дарга Б.Баярбаатараар ахлуулсан “Мал аж ахуйн салбарыг эрсдэлээс хамгаалах, гол нэрийн бүтээгдэхүүний хангамж, нийлүүлэлтийн тогтвортой байдлыг хангах, нөөцийг нэмэгдүүлэх хүрээнд баталсан хууль, тогтоолын хэрэгжилтийг хангах арга хэмжээний санал, дүгнэлт боловсруулах үүрэг бүхий ажлын хэсэг”-ийн бүрэлдэхүүн төвийн бүсийн тариаланчид, дотоодын үйлдвэрлэгчидтэй уулзсан бол энэ удаа нийслэлийн томоохон зах, худалдааны төвүүдэд ажиллаж, борлуулагчид болон хэрэглэгчдийн төлөөлөлтэй санал солилцлоо.Тодруулбал, УИХ-ын гишүүн, ажлын хэсгийн ахлагч Б.Баярбаатар, УИХ-ын гишүүн Ц.Мөнхтуяа, М.Нарантуяа-Нара нар “Нарантуул” олон улсын худалдааны төвд ажиллаж, гурилын бөөний болон килограмм тутмын үнэ, тээвэрлэлт, ачилтын бусад зардлууд, мөн эрэлт, нийлүүлэлтийн талаарх зах зээлийн мэдээллүүдийг нэгтгэв. Тус худалдааны төвд үйл ажиллагаагаа явуулж буй нийт 20 гаруй бөөний цэгээс нийслэл хот болон орон нутгийн хэрэглэгчид гурил худалдан авдаг бөгөөд сүүлийн үед борлуулалт харьцангуй багассаныг худалдаа эрхлэгчид хэлж байв. Эдгээр цэгүүдэд дотоодын үйлдвэрүүдээс нийлүүлж буй 25 килограммын савлагаатай дээд зэргийн гурилыг дунджаар 45000-68000 төгрөгийн хооронд худалдаалж байгаа бол нэгдүгээр зэргийн гурилын үнэ 43000-55000 төгрөгийн хооронд хэлбэлзэж байна. Түүнчлэн импортоор орж ирж буй гурилын килограмм тутмын үнэ нь харьцангуй хямд хэдий ч хэрэглэгчдийн хувьд амт, чанарыг нь харгалзан дотоодын үйлдвэрийн гурилыг түлхүү сонгодог гэж байлаа. Үргэлжлүүлэн ажлын хэсгийн гишүүд Сонгинохайрхан дүүргийн баруун бүс буюу Толгойт орчмын жижиглэн худалдааны газрууд, хүнсний төрөлжсөн дэлгүүрүүдээр орж гурил, гурилан бүтээгдэхүүний үнийн судалгаа, борлуулалтын мэдээллийг харьцуулав. Энэ үеэр УИХ-ын гишүүн Б.Баярбаатар, гол нэрийн стратегийн бүтээгдэхүүний хангамж, нийлүүлэлтийн сүлжээг тогтворжуулж, эрүүл, аюулгүй, баталгаат хүнсийг боломжийн үнээр хэрэглэгчдэд нийлүүлэх нь төрөөс баримталж буй бодлого, шийдвэрүүдийн тэргүүн зорилт гэдгийг тодотгосон юм. Ажлын хэсгийн гишүүдийн хувьд улаанбуудайн тариалалтаас эхлээд үйлдвэрлэл, түгээлт, борлуулалт гэхчилэн хэрэглэгчдийн гар дээр очих хүртэлх процессын өртөг зардал, зах зээлд оролцогч талуудын байр суурийг нэгтгэж, санал дүгнэлт боловсруулна гэж мэдэгдлээ хэмээн Улсын Их Хурлын Хэвлэл, мэдээллийн газраас мэдээллээ.

Монгол Улсын Ерөнхий сайд Л.Оюун-Эрдэнэ Иргэд, олон нийттэй харилцах 11-11 төвд иргэдээс ирүүлсэн санал, хүсэлт, өргөдөл, гомдолд хууль тогтоомжийн хүрээнд хариу өгч, төрийн үйлчилгээг түргэн шуурхай үзүүлэхийг Засгийн газрын гишүүд, агентлагийн дарга, аймаг, нийслэлийн Засаг дарга нарт үүрэг болгосон.Энэ дагуу өнөөдөр Боловсролын сайд П.Наранбаяр яам болон агентлагийн удирдлагуудын хамт тус төвд ажиллаж, иргэдтэй уулзлаа. Иргэд тэтгэвэрт гарсан багш нар болон энэ мэргэжлээр суралцаж байгаа төгсөх ангийн оюутнуудыг багшаар ажиллуулахыг дэмжиж буйгаа хэлж байв.Ахмад багш Ж.Цэдэндорж ЕБС-ийн хөтөлбөр явцуу хүрээнд сургалтын чанар тааруу байна. Ахлах ангийн сурагчдад системтэй мэдлэг олгож чадахгүй байгааг шүүмжлээд, сурах бичгийн чанарт онцгой анхаарахыг сайдаас хүслээ.Тус төвд өнгөрсөн наймдугаар сарын 20-наас есдүгээр сарын 26 хүртэлх хугацаанд боловсролын салбартай холбоотой 620 гаруй санал хүсэлт, гомдол ирснийг яам, харьяа агентлагуудад шилжүүлснээс 50 гаруй хувийг нь шийдвэрлэжээ. Үүнээс цэцэрлэг, сургуулийн хүртээмж, бүртгэл, багш, ажилтнуудтай холбоотой санал гомдол дийлэнх хувийг эзэлж байна.Боловсролын яам, харьяа агентлагийн холбогдох мэргэжилтнүүд ирэх сарын 01 хүртэл Иргэд, олон нийттэй харилцах 11-11 төвд ажиллаж, иргэдийн санал хүсэлтийг хүлээн авах юм.

Улаанбаатар хотын авто замын түгжрэлийг бууруулах, сүлжээг өргөтгөх зорилгоор Засгийн газар, нийслэлийн удирдлагууд авто зам, гүүрийн бүтээн байгуулалтыг эрчимжүүлээд байна. Тэдгээрийн нэг болох нийслэлийн төсвийн санхүүжилтээр баригдсан, Хан-Уул дүүргийн Наадамчдын гудамж буюу Яармагаас ТЭЦ-IV-ийн зам хүртэлх зургаан эгнээ бүхий хоёр урсгалтай шинэ замын зорчих хөдөлгөөнийг өнөөдөр нээлээ.Монгол Улсын Ерөнхий сайд Л.Оюун-Эрдэнэ уг авто замын бүтээн байгуулалттай танилцлаа. Туул, Дунд гол дээгүүр гурван гүүртэй, 2.4 км урттай тус замын гүүрийн ажлыг 2022 онд, авто замын бүтээн байгуулалтыг 2023 оны наймдугаар сард эхлүүлсэн. Гурван гүүрийн бүтээн байгуулалтыг “Мотор сервис”, “Туулын гүүр далай”, “Тэргүүн саруул зам” компаниудын түншлэлээр, гүүрүүдийг холбосон авто замын ажлыг “Тотал инж” компани гүйцэтгэсэн байна. Явган зам, дугуйн зам, гэрэлтүүлэг зэрэг тоноглол, тохижилтын ажлуудыг энэ ондоо багтаан дуусахаар төлөвлөжээ. Энэхүү авто замыг ашиглалтад оруулснаар Яармагийн замын ачаалал 20-30 хувиар буурах тооцоо гаргажээ.Цаашид уг замыг “Хархорин” захын авто замтай холбох,  ТЭЦ-IV-ийн замын төгсгөл буюу Гурвалжингийн гүүр, “Хөсөг трейд” рүү явдаг хөндлөн замыг дөрвөн эгнээ болгон өргөтгөх ажлыг үргэлжлүүлнэ.Нийслэлийн Засаг дарга Х.Нямбаатар Улаанбаатар хотын шинэ төв Яармагийн авто замыг Энхтайвны өргөн чөлөөтэй холбох гудамж замын нэгдүгээр хэсэг, Геологийн төв лабораторийн төмөр замын нүхэн гарц, Наадамчдын авто замыг Энхтайваны өргөн чөлөөтэй холбох гудамж замын хоёрдугаар хэсэг, Яармагийн шинэ зам зэрэг гол замуудыг 2022-2027 он хүртэл дөрвөн үе шаттайгаар хийж хэрэгжүүлэхээр төлөвлөсөн. Энэ дөрвөн цогц төслийг хэрэгжүүлснээр төвлөрлийг сааруулах, түгжрэлийг бууруулах зорилтын хүрээнд хотын төвийг тэлж, тээврийн хэрэгслийн хөдөлгөөний ачааллыг бууруулах зорилтот төслийн эхний үе шат дуусаж, өнөөдөр зорчих хөдөлгөөнийг нээж байгааг Ерөнхий сайдад танилцууллаа.Ерөнхий сайд Л.Оюун-Эрдэнэ сүүлийн хоёр жилд Монгол Улсын Засгийн газар нийслэлийн асуудалд онцгойлон анхаарч, Улаанбаатар хотын тулгамдсан олон асуудлыг сууриар нь шийдвэрлэхэд чиглэсэн хууль эрх зүйн болон үйл ажиллагааны цогц реформ хийх зорилт тавин ажиллаж байна. Сүүлийн 30 жилд нийслэлд нийт 11.5 их наяд төгрөгийн хөрөнгө оруулалт хийгдсэн бол 2024-2028 онд үүнээс гурав дахин их буюу 30 их наяд төгрөгийн хөрөнгө оруулалт хийхээр төлөвлөсөн. “Бүсчилсэн хөгжил-Улаанбаатар хот” бодлогын хүрээнд төрийн  үйлчилгээг иргэд “20 минут”-д авах шинэ стандарт бүхий хот төлөвлөлтийн цогц шийдэлтэй “Нийслэл Улаанбаатар хотын 2040 он хүртэлх хөгжлийн ерөнхий төлөвлөгөө"-г боловсруулж Улсын Их Хуралд өргөн барихаар ажиллаж байгааг онцлов. 

Боловсролын сайд П.Наранбаяр Зүүн бүс хариуцсан зөвлөх Л.Лхагвасүрэнгийн хамт НҮБ-ын Хүүхдийн сангийн Ази, Номхон далайн бүсийн Боловсролын зөвлөх Мицүэ Уэмураг хүлээн авч уулзан, цаашдын хамтын ажиллагааны талаар санал солилцлоо.НҮБ-ын Хүүхдийн сан нь Тогтвортой хөгжлийн зорилт 4 болох “Чанартай боловсролыг дэмжих” хүрээнд сургуулийн өмнөх болон ерөнхий боловсрол, хоол үйлдвэрлэл, цахим боловсрол, үе тэнгийн дээрэлхэлтээс сэргийлэх, тэгш хамран сургах чиглэлээр Монгол Улсад олон төсөл хөтөлбөр хэрэгжүүлж ирсэн. Үүний нэг болох сурагчдын сэтгэцийн эрүүл мэндийг дэмжих “Blindcare” төсөлд дэмжлэг үзүүлж, хамтран ажиллах болсонд Боловсролын сайд П.Наранбаяр талархал илэрхийлэв. Тэрбээр боловсролын чанарын ялгааг арилгах, малчдын хүүхэд гэр бүлийн орчноос холдолгүйгээр сайн боловсрол эзэмших боломжийг бүрдүүлэх Багийн бага сургуулийн төлөвлөлтийн талаар онцлон ярилцав.Багийн бага сургуулийн менежмент нь алслагдсан бүс нутгийн хүүхдүүдэд боловсролыг тэгш, хүртээмжтэй олгох оновчтой шийдэл болохыг Ази, Номхон далайн бүсийн Боловсролын зөвлөх Мицүэ Уэмура онцоллоо. Хүүхдийн эрхийг хамгаалах үндсэн зорилготой байгууллагын хувьд сурч боловсрох эрхийг хангахын тулд цаашид энэ төрлийн сургуулийг олшруулах, туршлагыг түгээн дэлгэрүүлэхэд хамтарч ажиллахаа илэрхийлэв.

Цаг агаар: Өнгөрсөн хоногт: Улаанбаатар хот болон Төв аймгийн нутгийн зарим газраар ялимгүй бороо орсон. Бусад нутгаар тогтуун байлаа.Өнөөдөр: Ихэнх нутгаар солигдмол үүлтэй. Баруун аймгуудын нутгийн зарим газар, төвийн аймгуудын ихэнх нутаг, говийн аймгуудын нутгийн хойд хэсгээр, бороо, нойтон цас орно. Ихэнх нутгаар баруунаас 5-10 м/с. Хангайн уулархаг нутаг, Завхан голын эх, Хүрэнбэлчир орчмоор +9...+14 градус, Алтайн өвөр говь, Эхийн голын Баянбүрд орчмоор +23...+28 градус, Их нууруудын хотгор, Хангайн нурууны өвөр бэл, говийн бүс нутгийн өмнөд хэсэг, Орхон, Сэлэнгэ, Хараа, Ерөө, Хэрлэн, Онон, Улз, Халх голын хөндий, Дорнод, Дарьгангын тал нутгаар +18...+23 градус, бусад нутгаар +13...+18 градус дулаан байна.Улаанбаатар хотод: Үүлшинэ. Оройдоо бага зэргийн бороо орно. Салхи баруунаас 5-10 м/с, +16...+18 градус дулаан байна.Гал түймэр: - Улаанбаатар хот, Чингэлтэй дүүрэг. 5 дугаар хороонд дэлгүүр шатаж байна гэсэн дуудлагыг 09.22-ны өдрийн 08:46 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн алба хаагчид 1 км замыг туулан 08:48 цагт очиход иргэн С-ийн 3 давхар барилгын 1 дүгээр давхарт 3х5 метрийн хэмжээтэй хүнсний агуулахын өрөөнд хөргөгч шатаж байсныг 10 минут ажиллаж унтраасан.- Төв аймаг, Батсүмбэр сум. Сөгнөгөр багт хураалттай өвс шатаж байна гэсэн дуудлагыг 09.22-ны өдрийн 14:47 цагт хүлээн авсан. Тус аймгийн Онцгой байдлын газрын Батсүмбэр сум дахь Гал түймэр унтраах, аврах 84 дүгээр ангийн алба хаагчид 18 км замыг туулан 15:16 цагт очиход иргэн Н-ийн 8 тн өвс шатаж байсныг 2 цаг 22 минут ажиллаж унтраасан.- Сэлэнгэ аймаг, Баянгол сум. Баян багт амбаар шатаж байна гэсэн дуудлагыг 09.22-ны өдрийн 15:47 цагт хүлээн авсан. Тус аймгийн Онцгой байдлын газрын Баянгол сум дахь Гал түймэр унтраах, аврах 40 дүгээр ангийн алба хаагчид 2.5 км замыг туулан 15:53 цагт очиход иргэн Ц-ийн 3х4 метрийн хэмжээтэй түлээний амбаар шатаж байсныг 16 минут ажиллаж унтраасан.    - Улаанбаатар хот, Баянзүрх дүүрэг. 42 дугаар хороонд хогийн цэгт хог шатаж байна гэсэн дуудлагыг 09.22-ний өдрийн 17:06 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчид 4 км замыг туулан 17:17 цагт очиход задгай хог шатаж байсныг 5 минут ажиллаж унтраасан.          - Төв аймаг, Баян сум. Өгөөмөр багт хашаа шатаж байна гэсэн дуудлагыг 09.22-ны өдрийн 17:09 цагт хүлээн авсан. Нийслэлийн Багахангай дүүргийн Онцгой байдлын хэлтсийн Гал түймэр унтраах, аврах 80 дугаар ангийн алба хаагчид 50 км замыг туулан 17:40 цагт очиход иргэн Т-ийн 80 метрийн урттай хашаа, 2х3 метрийн хэмжээтэй амбаар, 0.4 га орчим талбайд шар өвс шатаж байсныг 20 минут ажиллаж унтраасан.           - Баянхонгор аймаг, Гурванбулаг сум. Пионер толгой багт 09.22-ны өдрийн 18:00 цагийн орчим 1 гэр шатсан тухай мэдээллийг мөн өдрийн 21:10 цагт хүлээн авсан. Иргэн Ө-ийн 5 ханатай гэр, эд хогшил шатсаныг Гурванбулаг сумын Засаг даргын Тамгын газрын ажилтанууд  ажиллаж унтраасан тухай мэдээллийг тус сумын Засаг даргын орлогч аймгийн Онцгой байдлын газарт мэдээлсэн.- Улаанбаатар хот, Сүхбаатар дүүрэг. 19 дүгээр хороонд байшингийн дээврээс утаа гарч байна гэсэн дуудлагыг 09.22-ны өдрийн 18:22 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 74 дүгээр ангийн алба хаагчид 8 км замыг туулан 18:30 цагт очиход эзэн нь тодорхойгүй 3х5 метрийн хэмжээтэй байшингийн дээврийн хэсэг шатаж байсныг 10 минут ажиллаж унтраан тус дүүргийн Цагдаагийн 2 дугаар хэлтэст хүлээлгэн өгсөн.- Дорнод аймаг, Хэрлэн сум. 2 дугаар багт амбаар шатаж байна гэсэн дуудлагыг 09.22-ны өдрийн 18:31 цагт хүлээн авсан. Тус аймгийн Онцгой байдлын газрын Гал түймэр унтраах, аврах 52 дугаар ангийн алба хаагчид 3 км замыг туулан 18:34 цагт очиход эзэн нь тодорхойгүй 2x3 метрийн хэмжээтэй амбаар шатаж байсныг 7 минут ажиллаж унтраасан.- Төв аймаг, Сүмбэр сум. Жавхлант багт хураалттай өвс шатаж байна гэсэн дуудлагыг 09.22-ны өдрийн 18:11 цагт хүлээн авсан. Сэлэнгэ аймгийн Онцгой байдлын газрын Баянгол сум дахь Гал түймэр унтраах, аврах 40 дүгээр ангийн алба хаагчид 22 км замыг туулан 18:40 цагт очиход иргэн О-ын 30х40 метрийн хэмжээтэй 3300 боодол өвс шатаж байсныг 5 цаг 29 минут ажиллаж унтраасан.- Улаанбаатар хот, Сүхбаатар дүүрэг. 19 дүгээр хороонд байшингийн дээвэр шатаж байна гэсэн дуудлагыг 09.22-ны өдрийн 19:41 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 74 дүгээр ангийн алба хаагчид 1.5 км замыг туулан 19:44 цагт очиход иргэн А-ийн 8х10 метрийн хэмжээтэй байшингийн дээврийн хэсэг шатаж байсныг 15 минут ажиллаж унтраасан.- Улаанбаатар хот, Сүхбаатар дүүрэг. 18 дугаар хороонд байшин шатаж байна гэсэн дуудлагыг 09.22-ны өдрийн 20:17 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 34 дүгээр ангийн алба хаагчид 6 км замыг туулан 20:27 цагт очиход иргэн Э-ийн 2х4 метрийн хэмжээтэй амбаар, эд хогшил шатаж байсныг 10 минут ажиллаж унтраасан.         - Архангай аймаг, Эрдэнэбулган. 6 дугаар багт малын өвөлжөө шатаж байна гэсэн дуудлагыг 09.22-ны өдрийн 19:00 цагт хүлээн авсан. Тус аймгийн Онцгой байдлын газрын Гал түймэр унтраах, аврах 51 дүгээр ангийн алба хаагчид 28 км замыг туулан 20:40 цагт очиход иргэн Ц-ын 20х32 метрийн хэмжээтэй өвөлжөө шатаж байсныг 46 минут ажиллаж унтраасан.- Хэнтий аймаг, Баян-Адарга сум. Дуурлиг багт өвс шатаж байна гэсэн дуудлагыг 09.22-ны өдрийн 20:58 цагт хүлээн авсан. Тус аймгийн Онцгой байдлын газрын Баян-Адарга сум дахь Эрэн хайх, аврах салбарын алба хаагчид, сумын Мэргэжлийн ангийн алба хаагчид 2 км замыг туулан 21:07 цагт очиход иргэн Ц-ийн 8 тн орчим өвс шатаж байсныг 5 цаг 53 минут ажиллаж унтраасан.Хүний үйл ажиллагаатай холбоотой осол. Усны осол:- Хэнтий аймаг, Батширээт сум. Онон багийн “Өгөөмөр” гэдэг газар /аймгийн төвөөс хойд зүгт 218 км, сумын төвөөс хойд зүгт 30 км/. 09.17-ны өдрийн 17:00 цагийн орчимд Батширээт сумаас “Өгөөмөр” гэдэг газрын чиглэлд зорчиж явсан "Юнимог-400" загварын бага оврын ачааны автомашины жолооч Б/66 настай, эрэгтэй/, зорчигч И/58 настай, эрэгтэй/ нар "Онон" голын дээд гүүрээр гарч явахдаа голын ус руу унаж, автомашинтайгаа живсэн. Тус сумын Засаг даргын Тамгын газрын ажилтанууд 09.18-ны өдрийн 06:40 цагт гарч, 07:50 цагт очиж, 08:00 цагт эрэн хайх ажиллагааг зохион байгуулж, 08:40 цагт осолдсон газраас урд зүгт 8 км-т Онон багийн “Улаан бургас” гэдэг газраас жолооч Б-ийн цогцсыг голын эрэгт хайрагдаж тогтсон байсныг олж, тус сум дахь Цагдаагийн тассагт шилжүүлэн өгсөн. Зорчигч И-г эрэн хайх ажиллагааг зохион байгуулж байгаа тул хүч нэмэгдүүлэн ажиллах тухай хүсэлтийг 09.18-ны өдрийн 09:50 цагт хүлээн авсан. Хэнтий аймгийн Онцгой байдлын газрын Эрэн хайх, аврах салбарын алба хаагчид, Үндэсний аврах бригадын алба хаагчид Онон багийн “Өгөөмөр” гэдэг газар Онон голын 8 метрийн гүнээс  "Юнимог-400" загварын бага оврын ачааны автомашиныг татан гаргах ажиллагааг 09.22-ны өдрийн 08:40 цагаас зохион байгуулж, 15:10 цагт гаргаж, тус сум дахь Цагдаагийн хэсэгт хүлээлгэн өгсөн. Иргэн И-г эрэн хайх ажиллагааг 18:00 цаг хүртэл зохион байгуулсан боловч үр дүнд хүрээгүй тул зогсоосон. 09.23-ны өдрийн 07:00 цагаас эрэн хайх ажиллагааг эхлүүлсэн. - Хэнтий аймаг, Баян-Адарга сум. Адарга багийн "Уртын-Улиас" гэдэг газар /аймгийн төвөөс  зүүн хойд зүгт 160 км, сумын төвөөс зүүн хойд зүгт 40 км/ Иргэн М нь 09.08-ны өдөр суудлын автомашинтайгаа гэрээсээ гараад сураггүй алга болсон, "Онон" голын усанд осолдсон байж болзошгүй тухай дуудлагыг 09.19-ний өдрийн 21:00 цагт хүлээн авсан. Тус аймгийн Онцгой байдлын газрын Эрэн хайх, аврах салбарын алба хаагчид ар гэрийн хүмүүстэй хамтран иргэн М/55 настай, эрэгтэй/-ийг эрэн хайх ажиллагааг 09.22-ны өдрийн 07:00 цагаас Адарга багийн ”Уртын-Улиас” гэдэг газраас баруун зүгт 40 км-т “Адаргын-Овоо” гэдэг газар хүртэл “Онон” голын усаар завиар урсаж, голын эрэг дагуу явганаар зохион байгуулсан боловч үр дүнд хүрээгүй тул 19:30 цагт түр зогсоосон. 09.23-ны өдрийн 06:00 цагт эрэн хайх ажиллагааг эхлүүлсэн. - Архангай аймаг, Цэцэрлэг сум. Чулуут багийн “Дангийн тархи” гэдэг газар /аймгийн төвөөс хойд зүгт 290 км, сумын төвөөс хойд зүгт 80 км/ Тус сумын харьяат, иргэн М нь “Чулуут” голыг завиар гарч байгаад завь нь хөмөрч живсэн тухай дуудлагыг 09.21-ний өдрийн 21:50 цагт хүлээн авсан. Тус аймгийн Онцгой байдлын газрын Эрэн хайх, аврах салбарын алба хаагчид Цагдаагийн хэсгийн алба хаагч, орон нутгийн иргэд, ар гэрийн хүмүүстэй хамтран иргэн М/51настай, эрэгтэй/-г эрэн хайх ажиллагааг зохион байгуулж, 09.22-ны өдрийн 15:16 цагт осолдсон газраас 4 км-ын зайд, голын 3 метрийн гүнээс цогцсыг нь олж, тус сум дахь Цагдаагийн хэсэгт шилжүүлэн өгсөн. ОНЦГОЙ БАЙДЛЫН ЕРӨНХИЙ ГАЗАР