НИЙГЭМ

“20 минутын хот” Үндэсний хорооны анхдугаар хуралдаан өнөөдөр болж, иргэдээс дугаарын хязгаарлалт хийх эсэх талаар санал асуулга авч, олонх зөвшөөрсөн тохиолдолд дугаарын хязгаарлалтыг зохион байгуулах зөвлөмжийг нийслэлийн Засаг дарга бөгөөд Улаанбаатар хотын Захирагч Х.Нямбаатарт өгсөн юм.Энэ хүрээнд Нийслэлийн Засаг даргын Тамгын газрын албан ёсны  www.ulaanbaatar.mn сайтаар санал асуулга авч байна.Иргэд та бүхэн тус линкээр санал асуулгад оролцох боломжтой. 

Улаанбаатар хотын түгжрэлийг бууруулах ажлын хүрээнд Таван шарын гарам, Геологийн төв лабораторийн уулзвар, “Хермес” төвийн төмөр замын зоорь, Нарантуул захын дөрвөн замын уулзвар гэсэн 4 байршилд нүхэн гарц байгуулах төслийг хэрэгжүүлж буй. Үүний нэг болох Таван шарын нүхэн гарцын авто замын хөдөлгөөнийг өнөөдөр нээлээ.Нүхэн гарцын авто замын хөдөлгөөнийг нээх үеэр Хотын дарга Х.Нямбаатар “Нээлтэд хүрэлцэн ирсэн хүндэт зочид та бүхэнд баярлалаа. Ялангуяа төслийг санхүүжүүлсэн БНХАУ-ын Эксим банк болон бүтээн байгуулалтын ажлыг хийж гүйцэтгэсэн хамт олонд талархлаа илэрхийлье. 1949 онд Улаанбаатар хотод анхны төмөр зам байгуулагдсанаас хойш Улаанбаатар хотын авто замын хөдөлгөөн төмөр замын хөдөлгөөнтэй нэг түвшинд байж ирсэн. Энэхүү төсөл болон 2024 оны арав, арваннэгдүгээр сард хийж хэрэгжүүлэх нүхэн гарцын ажлууд, 2025 онд хэрэгжүүлэх Дүнжингаравын уулзварын нүхэн гарцыг барьснаар цаашид Улаанбаатар хотын авто замын хөдөлгөөн төмөр замын хөдөлгөөнтэй давхцахгүйгээр явах бүрэн боломж бүрдэнэ. Ингэснээр Улаанбаатар төмөр замын ачаа эргэлтийн хэмжээ өсөхөөс гадна Улаанбаатар хотын авто замын түгжрэлийг тодорхой түвшинд бууруулах тооцоо судалгаа гарсан. Ажлыг гүйцэтгэх явцад бүтээн байгуулалтыг хийж хэрэгжүүлсэн БНХАУ-ын төмөр замын барилгын компанийн ажилчдад зарим бэрхшээл тулгарсан. Улаанбаатар хотын газар доорх мэдээллийн сангийн зарим мэдээлэл дутагдалтай байснаас шалтгаалж тодорхой цаг хугацаанд ажил хойшлох нөхцөл байдалтай тулгарч байсан. Гэсэн хэдий ч Улаанбаатар хот, гүйцэтгэгч компани болон төслийн нэгжийн хэрэгжүүлж байгаа байгууллагуудын ажлын уялдаа сайн байсны үр дүнд цаг хугацаа хожиж, чанарын өндөр түвшинд ажлыг гүйцэтгэлээ. Тухайлбал, Ус сувгийн удирдах газрын хамт олон бүтээн байгуулалтын ажилд туслан гүйцэтгэгчээр ажиллалаа. Нүхэн гарцыг барихад олон байгууллагын ажлын уялдаа холбоо чухал байлаа. Түгжрэлгүй Улаанбаатарыг хамтдаа бүтээцгээе” хэмээн хэллээ.Таван шарын нүхэн гарц нь төмөр замын доогуур 169 метр урт, 5.8 метр өндөр, 10.2 метр өргөнтэй хос туннел, иж бүрэн ус зайлуулах систем бүхий инженерийн байгууламж гэдгээрээ Улаанбаатар хотдоо анхдагч бүтээн байгуулалт юм. Мөн хойд туслах авто зам 425 метр, урд туслах авто зам 252 метр урт бөгөөд хоёр түвшний огтлолцолтой. Нүхэн гарцыг бүрэн нээснээр хоногт 32,500 автомашин зорчих боломжтой болно. Ийнхүү авто замын нэвтрүүлэх чадвар нь 22,9 хувиар нэмэгдэж, түгжрэл бууруулахад үр нөлөөгөө үзүүлэх юм. Төмөр замын 396 дугаар гармаар хоногт 53 галт тэрэг өнгөрч, нийт 2 цаг 48 минут орчим хугацаанд гармыг хаадаг байна. Цаашид хоногт 5-6 цаг уг гармыг хаах шаардлага үүсэхээр тооцоо судалгаа гарсан тул нүхэн гарцыг барьснаар авто замын урсгал галт тэрэгний хөдөлгөөнөөс хамааралгүй болж байгаа онцлогтой. Төлөвлөгөөний дагуу Таван шарын нүхэн гарцыг аравдугаар сард бүрэн ашиглалтад оруулах бол есдүгээр сарын 14-ний өдөр ийнхүү авто замын хөдөлгөөнийг нээж байна.

Парламентын хууль тогтоох үйл ажиллагаанд баримтлах тэргүүлэх чиглэлүүдийн хүрээнд тухайлсан салбаруудын эрх зүйн орчныг боловсронгуй болгож, хууль тогтоомжийн хэрэгжилтийг эрчимжүүлэх чиг үүрэг бүхий 54 ажлын хэсгийг парламентад суудалтай бүх намын төлөөллийг оролцуулан Улсын Их Хурлын даргын захирамжаар байгуулсан.Энэ өдрүүдэд Улсын Их Хурлын гишүүн, Ёс зүй дэгийн байнгын хорооны дарга Б.Баярбаатараар ахлуулсан, Мал аж ахуйн салбарыг эрсдэлээс хамгаалах, гол нэрийн бүтээгдэхүүний хангамж, нийлүүлэлтийн тогтвортой байдлыг хангах, нөөцийг нэмэгдүүлэх хүрээнд баталсан хууль, тогтоолын хэрэгжилтийг хангах арга хэмжээний санал, дүгнэлт боловсруулах үүрэг бүхий ажлын хэсэг Дархан-Уул, Сэлэнгэ аймагт ажиллалаа.Улсын Их Хурал энэ оны 04 дүгээр сард Гаалийн албан татвараас чөлөөлөх тухай хууль, мөн “Хууль батлагдсантай холбогдуулан авах зарим арга хэмжээний тухай” Улсын Их Хурлын тогтоолыг баталсан. Ажлын хэсгийн гишүүд энэхүү хууль, тогтоолын хэрэгжилтийн үр нөлөө, тулгарч буй сорилт, бэрхшээлийг тодорхойлохын зэрэгцээ намрын ургац хураалтын явцтай танилцаж, улаан буудай тариаланчид, үндэсний үйлдвэрлэгчдийн төлөөлөлтэй уулзаж санал солилцсон юм.Улсын Их Хурлын гишүүн, ажлын хэсгийн ахлагч Б.Баярбаатар, Улсын Их Хурлын гишүүн П.Ганзориг, Ц.Мөнхтуяа, М.Нарантуяа-Нара нар албаны бусад хүмүүсийн хамт Сэлэнгэ аймгийн Баянгол суманд байрлах “Түмэн бут” ХХК-ийн ургац хураалтын явцтай танилцаж, дээрх хуулийн хэрэгжилтийн талаар орон нутгийн тариалан эрхлэгчидтэй уулзаж ярилцлаа. Энэ жилийн тухайд цаг агаарын нөхцөлөөс улбаатайгаар улаан буудайн натур жин бага байгааг эс тооцвол цавуулаг ихтэй, чанар сайн гарсныг тариаланчид онцолж байв. Уулзалтын үеэр “Түмэн бут” ХХК-ийн захирал Х.Даваахүү хэлэхдээ стратегийн таримал болох улаан буудайн үрийн чанар, стандартыг бодлогоор анхаарч, тариалангийн хөрсний үржил шимийг сайжруулж, хамгаалах асуудал нэн түрүүнд тулгамдаад буйг уламжиллаа. Тэрбээр үргэлжлүүлэн, энэ оны 05 дугаар сард улаан буудайн гурилыг гаалийн албан татвараас чөлөөлсөнтэй зэрэгцэн газар тарилан эрхлэгчдийг ч бодлогоор дэмжиж, хөнгөлөлтэй зээл, урамшуулалд хамруулах цар хүрээ, боломжийг нэмэгдүүлэх шаардлагатайг онцлов. Мөн энэ үеэр орон нутгийн удирдлагууд Сэлэнгэ аймгийн хэмжээнд намрын ургац хураалтын явцыг танилцуулж, “Хүнсний хувьсгал” хөдөлгөөний хүрээнд эргэлтийн хөрөнгө болон хөрөнгө оруулалтын зориулалтаар олгосон хөнгөлөлттэй зээлийн мэдээллийг хүргэлээ.Ажлын хэсгийн гишүүд үргэлжлүүлэн Дархан-Уул аймгийн Дархан суманд байрлах “Улаанбаатар гурил” ХХК, “Өег гурил” ХХК-ийн үйлдвэрүүдэд ажилласан юм. Дотоодын гурилын үйлдвэрүүд хүчин чадлаас хамааран жил бүр улаан буудайн нөөцөө тариалан эрхлэгчдээс гэрээний дагуу худалдан авдаг бөгөөд байгаль, цаг уурын нөхцөлөөс шалтгаалан буудайн гарц, чанар, үнэ харилцан адилгүй хэлбэлздэг байна. Ажлын хэсгийн гишүүд гурилын үйлдвэрүүдэд ажиллах үеэрээ тариалан эрхлэгчдээс худалдан авч буй улаан буудайн сорт бүрийн тонн тутмын дундаж ханш, чанар болон нөөцийн үзүүлэлтүүдийг нэгтгэж, гурилын үйлдвэрээс гарч буй нэг килограмм тутмын үнийн мэдээллийг харьцуулан хэлэлцэв. Түүнчлэн Гаалийн албан татвараас чөлөөлөх тухай хуулийн хэрэгжилтийн талаар санал солилцож, гурил үйлдвэрлэгчдийн байр суурийг сонслоо. Дотоодын гурилын нийт хэрэгцээний 35 хувийг хангадаг “Улаанбаатар гурил” ХХК-ийн дөрвөн дамжлага бүхий бүрэн автомат үйлдвэр нь өнөөдрийн байдлаар 34 хувийн хүчин чадлаараа ажиллаж байгааг удирдлагуудын төлөөлөл хэлж байв. Зах зээлийн өрсөлдөөнийг дэмжиж, үнийг тогтворжуулах шийдэлтэй хамтатган үндэсний үйлдвэрлэл эрхлэгчид, ажлын байр бий болгогчдыг дэмжих ёстойг ч тэд дурдлаа.Уулзалтын үеэр Улсын Их Хурлын гишүүн Б.Баярбаатар, гол нэрийн стратегийн бүтээгдэхүүний хангамж, нийлүүлэлтийн сүлжээг тогтворжуулж, эрүүл, аюулгүй, баталгаат хүнсийг боломжийн үнээр хэрэглэгчдэд нийлүүлэх нь төрөөс баримталж буй бодлого, шийдвэрүүдийн тэргүүн зорилт гэдгийг тодотгов. Үүний тулд тариалан эрхлэгчид, гурил үйлдвэрлэгчид, бодлого тодорхойлогчид хамтран, тулгарч буй бэрхшээл, сорилтуудыг тодорхойлж, санал шийдлээ дэвшүүлэх ёстойг хэллээ. Дараа нь ажлын хэсгийн өргөтгөсөн бүрэлдэхүүн төвийн бүсийн тариаланчид болон газар тариалангийн тоног төхөөрөмж нийлүүлдэг дилер компани, аж ахуйн нэгжийн төлөөлөлтэй хамтарсан хэлэлцүүлэг өрнүүлсэн юм. Улаанбуудайн гурилыг гаалийн албан татвараас чөлөөлснөөр тариалан эрхлэгчид, дотоодын үйлдвэрлэгчид болон салбарын хэмжээнд ямар үр нөлөө, өөрчлөлт гарсныг хэлэлцүүлэгт оролцогчид нээлттэй хуваалцлаа. “Атрын III аян”-аас хойш газар тариалангийн салбар эрчимтэй сэргэж, “Хүнсний хувьсгал” хөдөлгөөн нь дотоодын үйлдвэрлэл эрхлэгчдэд бодитой дэмжлэг болсныг салбарынхан онцлохын зэрэгцээ бодлогын залгамж халаа, тогтвортой байдал чухал нөлөөтэйг санал нэгтэй уламжилцгаав. Тэдний зүгээс импортын гурил, буудайн чанар, эх орны хөрс хамгаалах технологи, бордооны зохистой хэрэглээ болон хүний нөөцийг бэлтгэх асуудалд онцгой анхаарч, салбарын хөгжлийг шинжлэх ухаанч шийдэлд тулгуурлан авч үзэх хэрэгтэйг дэвшүүлж байлаа.Энэ жилийн хувьд зарим бүс нутгаар тариалалтын хэмжээ тодорхой хувиар буурсан ч ургац хураалт урьдчилсан балансаар хэвийн хэмжээнд үргэлжилж байгааг салбарын яамны төлөөлөл дурдсан юм. Харин техник, тоног төхөөрөмж нийлүүлдэг дилер компаниудын хувьд, улаанбуудайн тариалалт багассантай холбогдуулан захиалгат ажлууд цуцлагдсан нь санхүүгийн хувьд хүндрэлтэй нөхцөл байдалд хүргэснийг тэмдэглэн хэлэв. Хэлэлцүүлгийн үеэр УИХ-ын гишүүн П.Ганзориг, гадаад нөхцөл байдлаас шалтгаалан буудайн өртөг хэрхэн хэлбэлзсэн талаар тодруулж, борлуулалтын доод үнэ, холбогдох стандартуудын хүрээнд асуулт асууж, хариулт авсан юм. Мөн УИХ-ын гишүүн М.Нарантуяа-Нара, хөдөө аж ахуйн салбарт мэргэшсэн боловсон хүчний хомсдол тулгарсныг анхаарч, орон нутагтаа тогтвор суурьшилтай ажиллах боломжийг бүрдүүлэх нь зүйтэй гэдгийг онцолсон.Хэлэлцүүлгийн дараа ажлын хэсгийн гишүүд Сэлэнгэ аймагт байрлах “Хөдөө аж ахуйн корпораци” ТӨХХК-ийн удирдлагуудтай уулзаж, буудай хүлээн авах бэлтгэл ажил болон үр тарианы дээж шинжлэх лабораторийн үйл ажиллагаатай танилцлаа. Түүнчлэн ажлын хэсгийн бүрэлдэхүүн Сүхбаатар боомт дахь нэг цэгийн үйлчилгээний цогцолборт ажиллах үеэр өнгөрсөн онуудад импортоор орж ирсэн улаан буудай, гурилын гарал үүсэл, гаалийн нэгж үнэ, татвар болон бусад тоон мэдээллүүдийг Сэлэнгэ аймаг дахь Гаалийн газраас танилцуулсан юм. Гаалийн албан татвараас чөлөөлөх тухай хуулийн хэрэгжилтийн хүрээнд бодит үр нөлөөг судалж, зах зээл дэх оролцогч талуудын байр суурийг нэгтгэн, цаашид авах арга хэмжээний санал дүгнэлтийг боловсруулахын тулд олон талт уулзалт, хэлэлцүүлгүүдийг зохион байгуулна гэдгийг УИХ-ын гишүүн, ажлын хэсгийн ахлагч Б.Баярбаатар тэмдэглэн хэллээ.Ажлын хэсгийг Дархан-Уул, Сэлэнгэ аймагт ажиллах үеэр ХХААХҮЯ, Үндэсний статистискийн хороо, Шударга өрсөлдөөн, хэрэглэгчийн төлөө газар, Хилийн боомтын захиргааны төлөөлөл болон орон нутгийн удирдлагууд байлцав хэмээн Улсын Их Хурлын Хэвлэл мэдээллийн газраас мэдээллээ.

Нийслэлийн Засаг дарга бөгөөд Улаанбаатар хотын Захирагч Х.Нямбаатарын санаачилгаар авто замын ачааллыг бууруулах зорилгоор “Еcomobility” аяныг эхлүүлсэн. Авто машинаа дундаа ашиглах, алхах, унадаг дугуй, нийтийн тээвэр хэрэглэхийг уриалж буй зэрэг нь нийлээд сүүлийн үед дэлхийн түгжрэл ихтэй томоохон хотуудад трэнд болж буй “Эко мобилити” гэх үзэл санаа юм. Монгол Улсын нийслэл Улаанбаатар хот иргэнд ээлтэй, “Эко мобилити”-д нэгдэх таатай орчин бүрдүүлэх чиглэлээр олон ажлыг хийж эхэлсэн.Тухайлбал,Явган хүний замыг засаж, сайжруулж байна. Энэ онд хот 27800 ам метр явган зам тохижуулахаар төлөвлөсөн бөгөөд өнөөдрийн байдлаар 95 хувийн гүйцэтгэлтэй байна.Хотын захуудад авто зогсоол олон байгуулж, менежмент хийж байна.Нийтийн тээврийн 109 автобусыг нэмэлтээр явуулж, өдөрт 1200 орчим автобус үйлчилж байна. Энэ сард их багтаамжийн 31 автобусыг хүлээж авна.Хөдөлгөөн ихтэй хорин уулзварын явган зорчигчийн гэрлэн дохио асах хугацааг 40 секунд болголоо.Мөн дэд бүтцийн хүртээмжийг нэмэгдүүлж, орчин нөхцөлийг сайжруулан ажиллаж байна.Тухайлбал,Орон нутгийн тээврийн хэрэгсэл Улаанбаатар хотод 48 цагаас дээш хугацаагаар зорчвол хоног тутам 5000 төгрөгийн хураамж авна. Товчоодод хяналтын системийг бүрэн нэвтрүүлж дууслаа.Нийслэлийн төр, захиргааны байгууллагын цэнхэр дугаартай автомашины 50 хувийг хөдөлгөөнд оролцуулахгүй. Энэ хүрээнд төрийн албан хаагчдыг ажилчдын автобусаар авна. Засгийн газрын ордны албан хаагчид ажилчдын автобусаар зорчиж эхэлсэн.Мөн төрийн албан хаагчдыг 7 хоногийн нэг өдөр цахимаар ажиллуулна.Татвар, торгуулиа төлөөгүй, техникийн хяналтын үзлэгт ороогүй тээврийн хэрэгслийг хөдөлгөөнд оролцуулахгүй.Автобусны зогсоол дээр зогссон жолоочийн зөрчлийг хяналтын камераар илрүүлж эхэлсэн.Тус аяны талаар хотын дарга Х.Нямбаатар “Зөвхөн олон нийтийн хичээл зүтгэлээр түгжрэлийн асуудалтай тэмцэх гэж байна гэж битгий ойлгоорой. Энэ бол түр зуурын арга хэмжээ ч цаашид хэрэгжүүлж хэвшвэл мөнхүү хотын соёл билээ. Бид бүхний хувьд метроны төслөө гараанаас нь гаргаж, зөвлөх компаниа сонгон шалгаруулаад байна. Тойрог хурдны замын төслийн ажлыг эхлүүллээ. Дүүжин тээврийг Францын хөрөнгө оруулалтаар хэрэгжүүлэхээр хоёр тал ажлаа эхлүүлээд байна. Төмөр замын огтлолцлын нүхэн гарцуудыг орчин үеийн жишигт нийцүүлэн шинээр байгуулах ажлуудыг ч хэрэгжүүлж, эхнээсээ ашиглалтад ороход бэлэн болжээ. Хүн нэг бүр Улаанбаатар хотоо өөрийн гэр, энд амьдарч буй ах дүүсээ гэр бүлийн гишүүн мэт санаж, дор бүрнээ ухамсарлан хичээвээс хүндрэл бэрхшээлтэй цаг үеийг туулан гарахад улам амар болох билээ” гэв.

"Ажил хэрэгч Улаанбаатар" ЖДҮ эрхлэгч эмэгтэйчүүдийн уулзалт боллоо. Уулзалтад нийслэлийн Засаг дарга бөгөөд Улаанбаатар хотын Захирагч Х.Нямбаатар, НЗД-ын орлогч Л.Хосбаяр болон ЖДҮ эрхлэгч 200 гаруй эмэгтэй оролцсон юм.Улаанбаатар хотын жижиг, дунд бизнес эрхлэгч эмэгтэйчүүдийн төлөөллөөр дамжуулж, бизнесийн салбарт тулгамдаж буй асуудлыг тодорхойлж, шийдлийн санал, санаачилгыг хэлэлцэв.Энэ үеэр хотын дарга Х.Нямбаатар “Жижиг, дунд бизнес эрхлэгчдийн эдийн засгийн чадавхыг нэмэгдүүлэхийн тулд экспортыг нэмэгдүүлэх, импортыг орлох бүтээгдэхүүн үйлдвэрлэлийг хөгжүүлэхийг баримталж байгаа. Үүндээ экспортын түвшний асуудлын хувьд үйлдвэрийн хүчин чадлын хүрэлцээ, олон улсын чанарын үзүүлэлт зэрэг хүчин зүйлүүд шууд нөлөөлөх тул илүү урт хугацаандаа үе шаттайгаар сайжруулах ажлуудыг хийнэ. Харин бид илүү богино хугацаанд бодит үр дүнг гаргахын тулд нэн түрүүнд импортыг орлож, дотоодын хэрэгцээгээ хангах салбарууд руу чиглэсэн төсөл, арга хэмжээнүүдийг хэрэгжүүлж ажиллах нь чухал байна. Эдийн засгийн хувьд ЖДҮ салбарыг хөгжүүлэхэд ганц төрийн байгууллага эсвэл хувийн хэвшил нь дан дангаараа хөгжсөн загвар олон улсад байдаггүй. Бид эдийн засгаа төрөлжүүлж, жижиг, дунд бизнесийн салбарын өрсөлдөх чадварыг нэмэгдүүлэхийн тулд төр, хувийн хэвшлийн хамтын ажиллагаа зайлшгүй шаардлагатай. Нэг салбарыг нарийвчлан кластер хэлбэрийн жишиг загварыг хөгжүүлж, бусад сүү, мах махан бүтээгдэхүүн, эрчимжсэн МАА-н салбаруудад  нэвтрүүлж нийслэлийнхээ хэрэгцээгээ бүрэн хангах боломж бүрдэнэ. Үүнд төр, хувийн хэвшлийн хамтын ажиллагаа, ялангуяа тухайн салбарын том аж ахуйн нэгжүүдийн оролцоо хамгийн чухал” гэлээ.ЖДҮ эрхлэгч эмэгтэйчүүдээс татварын  асуудал, борлуулалтын цэг, ажиллах хүчний хомсдол, тоног төхөөрөмжийн дэмжлэг, ЖДҮҮ зээлийн нөхцөл шаардлага зэрэг тулгамдаж буй асуудлаа уламжиллаа. Хотын дарга Х.Нямбаатар өөрийн эрх хэмжээний хүрээнд үйлдвэрлэгчдийн асуудлыг шийдвэрлэж, бусад асуудлыг судлан үзэж, шийдвэрлэж өгөхийг холбогдох албаныханд үүрэг болгосон юм. 

Дүүргийн Засаг даргын Тамгын газар, Нийслэлийн Засаг даргын эрхлэх асуудлын хүрээний зарим агентлагийн захиалгаар зарласан төрийн жинхэнэ албаны удирдах, гүйцэтгэх албан тушаалын 40 сул орон тоог нөхөх тусгай шалгалтын зарыг Төрийн албаны зөвлөлд хүргүүлсэн. Сонгон шалгаруулалтын бүртгэл өнгөрсөн сарын 16-ны өдрийн 09:00 цагт эхэлж, энэ сарын 29-ний өдрийн 17:00 цагт дууссан. Шалгалтад 23 сул орон тоонд 31 албан хаагч, иргэн бүртгүүлэхээр хүсэлтээ ирүүлсэн байна.Төрийн албаны зөвлөлийн Нийслэл дэх салбар зөвлөлийн 2024 оны 201 дүгээр тогтоолоор байгуулсан комисс хуралдаж, Төрийн жинхэнэ албаны гүйцэтгэх албан тушаалын 14 сул орон тоонд 15 иргэний, удирдах албан тушаалын 4 сул орон тоонд 4 албан хаагч, иргэний бүртгэлийг хянан баталгаажууллаа. Бүртгэл нь баталгаажсан 19 албан хаагч, иргэн Төрийн албаны зөвлөлөөс тогтоосон товын дагуу тусгай шалгалт өгнө. Шалгалт Яармаг дахь нутгийн захиргааны цогцолборт 9 дүгээр сарын 09:00 цагт эхэлнэ.НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

БШУЯ, ЭМЯ, ХХААХҮЯ-ны Салбарын хяналтын газраас  баталсан бүх шатны сургалтын байгууллагуудын 2024-2025 оны хичээлийн жилийн бэлтгэл, үйл ажиллагаанд урьдчилан сэргийлэх хяналт шалгалт хийх тухай удирдамж гарсан. Энэ дагуу  нийслэлийн Хүнс, хөдөө аж ахуйн газраас энэ сарын 3-ны өдрөөс эхлэн сургууль, цэцэрлэгийн хүүхдийн хоол, хүнс бэлтгэж буй газруудад хүнсний аюулгүй байдлыг хангуулах, болзошгүй эрсдэлээс урьдчилан сэргийлэх хяналт шалгалтыг хийж байна.Өнөөдрийн байдлаар шалгалтад 18  сургууль, цэцэрлэгийг хамруулсан бөгөөд хоол үйлдвэрлэлийн тоног төхөөрөмж, багаж хэрэгсэл хүрэлцээгүй, хоол үйлдвэрлэлийн  технологийн  картад   орц,   илчлэг,  шим  тэжээллэг  чанар, боловсруулах технологи ажиллагааг бүрэн тусгаагүй зэрэг зөрчил илэрсэн 2 цэцэрлэгт хугацаатай албан шаардлагаар үүрэг даалгавар өглөө.Түүнчлэн нийслэлийн Засаг даргын 2024 оны А/1022 дугаар захирамж, Нийслэлийн Засаг даргаас өгсөн үүрэг даалгаврын дагуу НХХААГ-аас төлөвлөгөөт бус хяналт шалгалтыг энэ сарын дүгээр сарын 4-ний өдрөөс эхлэн ажлын 10 хоногийн хугацаанд хийнэ.сүүдрэвчтэй болон ил задгай хүнсний худалдаа, явуулын болон гадна талбайн үйлчилгээтэй түргэн хоолны цэг,Улирлын чанартай хүнсний ногоо худалдаалж буй цэгүүд,Ерөнхий боловсролын сургууль, цэцэрлэгийн дэргэдэх болон гэр хороололд үйл ажиллагаа явуулж буй хүнсний дэлгүүр, мухлагууд,Зайрмагийн үйлдвэрлэл, байгалийн болон жижиглэн савлагаатай хүнсний үйлдвэрлэлийн газруудад хяналт шалгалт хийж байна.

Монгол Улсын Ерөнхийлөгч Ухнаагийн Хүрэлсүх Монголын радиогийн 90 жилийн ойг тохиолдуулан зарлиг гаргаж, хэвлэл мэдээллийн салбарын хөгжилд үнэтэй хувь нэмэр оруулж, эрхэлсэн ажилдаа өндөр амжилт гаргасан дараах уран бүтээлчдэд төрийн дээд цол, одон, медаль гардууллаа.Соёлын гавьяат зүтгэлтэн цолыг:Монголын үндэсний олон нийтийн радио, телевизийн ахмад ажилтан, телевиз, радиогийн сэтгүүлч Цэндийн Сүхбаатар,Урлагийн гавьяат зүтгэлтэн цолыг:Монголын үндэсний олон нийтийн радио, телевизийн ахмад ажилтан Рагчаагийн Ганбаатар,Гавьяат холбоочин цолыг:Монголын үндэсний олон нийтийн радио, телевизийн зөвлөх инженер Чулууны Цагаан нарт хүртээв.Сүхбаатарын одонгоор:Монголын олон нийтийн радиогийн ахмад ажилтан, Соёлын гавьяат зүтгэлтэн Товуучийн Бямбадорж,Хөдөлмөрийн гавьяаны улаан тугийн одонгоор:Монголын олон нийтийн радиогийн ахмад ажилтан Рэгзэнгийн Чулуунцэцэг,Монголын үндэсний олон нийтийн радио, телевизийн Техникийн төвийн инженер Мягмарсүрэнгийн Мандахнар,Алтан гадас одонгоор:Монголын үндэсний олон нийтийн радио, телевизийн Техникийн төвийн радиогийн техникийн албаны инженер Пүрэвдоржийн Золзаяа,Монголын үндэсний олон нийтийн радио, телевизийн Техникийн төвийн радиогийн техникийн албаны инженер Балдоржийн Мөнхтуяа,Монголын олон нийтийн радиогийн ахлах редактор Шагжжавын Одончимэг,Монголын үндэсний олон нийтийн радио, телевизийн Алтан сан хөмрөгийн эрхлэгч Лундаагийн Хэрлэнтуул,“Монголын дуу хоолой” радиогийн редактор Ням-Очирын Баасанжав,“Монголын дуу хоолой” радиогийн Орос хэлний редакцын ахлах редактор Доржийн Эрдэнэбат,Монголын үндэсний олон нийтийн радио, телевизийн Техникийн төвийн радиогийн техникийн албаны инженер Дэмбэрэлийн Оюунтунгалаг,Хөдөлмөрийн хүндэт медалиар:“Монголын дуу хоолой” радиогийн Хятад хэлний редакцын орчуулагч, редактор Гүнрэгжавын Цэнд-Аюуш,Монголын олон нийтийн радиогийн редактор Намхайн Хоролсүрэн нарыг шагналаа.

Сүхбаатар дүүрэг, Их тойруугийн авто зам буюу Дөлгөөн нуур худалдааны төвийн уулзвараас Өлзий төв хүртэлх авто замыг 9 дүгээр сарын 6-ны өдрийн 22:00 цагаас 9-ний өдрийн 06:00 цагийн хооронд хааж, шинэчилнэ. Энэ хүрээнд инженерийн шугам сүлжээний худгийн тагийг асфальт бетон хучилтын түвшинд тааруулах, хашлага солино. Иймд иргэд, жолооч та бүхэн бусад замыг сонгон хөдөлгөөнд оролцоно уу. НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

Өнгөрсөн хоёрдугаар сард нийслэлийн иргэдийн төлөөлөгчдийн хурлаас нийслэлд олгох улсын бүртгэлийн дугаарын дээд хязгаарыг 730 мянга байхаар тогтоосон. Үүнтэй холбоотойгоор тээврийн хэрэгслийн улсын дугаар олголтыг нийслэлийн Замын хөдөлгөөний удирдлагын төвд шилжүүлэх Зам, тээврийн сайдын тушаал гарсан.Тээврийн хэрэгслийн бүртгэл нийслэлд шилжин ирж байгаатай холбогдуулан бүртгэлийн системд өөрчлөлт оруулах ажлууд хийгдэж байна. Өнөөдрийн байдлаар нийслэл хотод 750 мянга гаруй тээврийн хэрэгсэл бүртгэлтэй байна. Үүнээс гадна техникийн хяналтын үзлэг, оношилгоонд ороогүй таваас дээш жил болсон 55 мянган тээврийн хэрэгслийн улсын дугаар бүртгэлтэй байна.  Хэрэв дээрх тээврийн хэрэгслүүд үзлэг оношилгоонд орж тэнцсэн тохиолдолд авто машиныг хөдөлгөөнд оролцуулна.Өнгөрсөн жилүүдэд жилд 50-60 мянган тээврийн хэрэгсэл импортоор ирж улсын бүртгэлийн дугаар авдаг байсан бол энэ оны эхний 9 сарын байдлаар 89 мянган тээврийн хэрэгсэл улсын бүртгэлийн дугаар аваад байгааг Замын хөгжлийн удирдлагын төвөөс мэдээллээ.ЗХУТ-ийн Зөрчил бүртгэлийн хэлтсийн дарга Ш.Гантөмөр “Улсын бүртгэлийн дугаарын дээд хязгаар 730 мянга давчихсан байгаа. Үүнтэй холбоотойгоор ажлын хэсгээс автобус, чиргүүл, зүтгүүр, мотоцикл, цистерн, механизмыг шалгуур үзүүлэлтэд оролцуулахгүй байх саналыг журамд тусгуулахаар боловсруулж байгаа ” гэв.

Байгалийн шинжлэх ухааны үндэсний музейн шинэ барилгын бүтээн байгуулалт эхэллээ.6.6 га газарт баригдах музейн барилга 45 мянга орчим хавтгай дөрвөлжин талбайтай, талбайн хэмжээгээрээ Ази тивийн улс орнуудын байгалийн музейн дунд долоодугаарт эрэмбэлэгдэх юм.Өөрөөр хэлбэл Байгалийн түүхийн музей одоо түр байрлаж байгаа Лениний музейн барилгаас 13 дахин том гэсэн үг.  2019 онд У.Хүрэлсүхийн тэргүүлсэн Засгийн газар Их тэнгэрийн аманд баригдаж байгаад ажил нь зогссон “Зочид буудал, хурлын цогцолбор”-ын барилгын зориулалтыг өөрчилж, Байгалийн түүхийн музей болгох шийдвэр гаргасан юм.Цар тахлын он жилүүдэд зураг төслийг өөрчлөх, гүйцэтгэсэн ажлыг хөрөнгөд бүртгэх, төлбөрийг нь шийдвэрлэх, гүйцэтгэгчийг шалгаруулах зэрэг ажил хийжээ.Ерөнхийлөгч У.Хүрэлсүх бүтээн байгуулалтыг эхлүүлэх ёслолд оролцохдоо,  Засгийн газар, холбогдох яам, нийслэл, гүйцэтгэгч компанийн хамт олонд талархал илэрхийллээ. Ард иргэдийн оюун санаанд томоохон хөрөнгө оруулалт болох музейн барилгын ажлыг товлосон хугацаанд нь, чанартай барьж ашиглалтад оруулахад онцгой анхаарахыг хүсэв.Энэ музей шим ертөнц, хүн төрөлхтний үүсэл хөгжил, геологи, палеонтологи, газарзүй, биологийн төрөл зүйл, байгаль экологи, экосистемийн зүй тогтол, хувьсал өөрчлөлтийн тухай мэдлэг түгээн, байгалийн хуулиудыг хүүхэд багачуудад танин мэдүүлж, эх дэлхий, элгэн нутгаа хайрлан хамгаалах, эх орноороо бахархах үзэл санааг төлөвшүүлэхэд чухал үүрэг гүйцэтгэнэ гэдэгт итгэл төгс байгаагаа хэллээ.Мөн  бүс нутгийн болон олон улсын байгалийн шинжлэх ухааны хөгжил дэвшилд хувь нэмэр оруулах, судалгааны эх сурвалж, мэдлэгийн эх булаг болно гэдгийг тэмдэглэв.Монгол Улсын Ерөнхийлөгч Ухнаагийн Хүрэлсүх Ерөнхий сайдаар ажиллаж байхдаа “Чингис хаан” үндэсний музей, Байгалийн түүхийн музей, Үндэсний урлагийн их театр, спорт цогцолборын бүтээн байгуулалтыг эхлүүлж байлаа. Цар тахал, эдийн засаг, геополитикийн хүндрэл, бэрхшээл тохиолдож байсан ч “Чингис хаан” үндэсний музей болон олон жил гацсан Үндэсний номын сангийн барилгын ажлыг гүйцээн, ашиглалтад оруулсан юм.Эдгээр бүтээн байгуулалт нь монголчууд оюун ухаан, мэдлэг чадвар, хүч хөдөлмөр, хүсэл зориг, эрч хүчээ нэгтгэн хамтран ажиллавал ямар ч зүйлийг даван туулж, хийж бүтээж чаддаг гэдгийн нотолгоо болсныг Ерөнхийлөгч онцоллоо.Ногоон байгууламж, авто зогсоол зэргийг цогцоор нь шийдсэн Байгалийн шинжлэх ухааны үндэсний музейн барилгын ажлын гүйцэтгэгчээр “Содон Номин констракшн” компани ажиллаж байна. Музей 2026 оны дөрөвдүгээр улиралд ашиглалтад орно.Байгалийн түүхийн музейн үндэс суурь 1924 онд тавигдаж, 1956 онд шинэчлэн байгуулагдсан түүхтэй. 1991 оноос Улсын төв музейн бүрэлдэхүүнээс гарч Байгалийн түүхийн музей болжээ.Өдгөө тус музей сан хөмрөгтөө байгаа 12 мянга орчим байгалийн холбогдолтой үзмэр, эд өлгийн зүйлээс нийтэд толилуулж, байгалийн чиглэлээр бие даасан болон хамтарсан эрдэм шинжилгээ, судалгааны ажил явуулж байна.

Улаанбаатар хотод хийгдэж буй шугам хоолойн засвар, шинэчлэлийн ажилтай холбогдуулан Улаанбаатар хотын Захирагчийн ажлын албаны дарга бөгөөд Ерөнхий менежер Ц.Төрхүү нийслэлийн харьяа инженерийн шугам сүлжээний байгууллагуудын инженер, холбогдох мэргэжилтнүүдтэй уулзлаа.Уулзалтад “Улаанбаатар дулааны сүлжээ” ТӨХК, “Ус сувгийн удирдах газар” ОНӨААТҮГ, “Геодези, усны барилга байгууламжийн газар” ОНӨААТҮГ, “Цахилгаан түгээх сүлжээ” ТӨХК, “Орон сууц нийтийн аж ахуйн удирдах газар” ОНӨААТҮГ, “Замын хөдөлгөөн удирдлагын төв” НӨҮГ зэрэг байгууллагуудаас хийж хэрэгжүүлж буй ажлын явц, тулгамдаж буй асуудлын талаар хэлэлцэж санал солилцлоо.Энэ үеэр дээрх байгууллагуудаас шугам хоолойн засвар, шинэчлэлийн ажлын явцад газар чөлөөлөлт, төрийн байгууллагын зөвшөөрөл,  зураг төсөлд тусгагдаагүй зэрэг асуудлаас болж шинэчлэлийн ажил удаашралтай байгааг тайлбарлалаа.Үүнтэй холбогдуулан Улаанбаатар хотын Захирагчийн ажлын албаны дарга бөгөөд Ерөнхий менежер Ц.Төрхүү шугам хоолойн засвар, шинэчлэлийн ажлыг гүйцэтгэж буй гүйцэтгэгч компаниудад ажлаа шуурхайлж, гэрээт хугацаандаа ажлаа дуусгахыг үүрэг болголоо. Мөн салбар байгууллагууд уялдаа холбоогоо сайжруулж, ажлаа эрчимжүүлэхийг анхаарууллаа.  

Газрын эрхийн дахин дуудлага худалдааг архитеkтор төлөвлөлтийн даалгавартай дараах 12 байршилд зарлаж байна.Төмс, хүнсний ногооны усалгаатай тариалангийн зориулалтаар;Налайх дүүргийн 5 дугаар хороо, Гандан-Уул орчимд нэг га хэмжээтэй /1.0 га/ нэг байршил /#2024-15668/ https://mle.mn/#/auction/detail/21724Хөдөө аж ахуйн үйлдвэрлэлийн зориулалтаар;Сонгинохайрхан дүүргийн 32 дугаар хороо, Эмээлт орчимд гурав аравны таван га хэмжээтэй /3.5га/ нэг байршил /#2024-15521/ https://mle.mn/#/auction/detail/21720Баянзүрх дүүргийн 11 дүгээр хороо, Хонхор орчимд таван га хэмжээтэй /5.0 га/ нэг байршил /#2024-15645/ https://mle.mn/#/auction/detail/21717Сонгинохайрхан дүүргийн 21 дүгээр хороо, Гурав жаран есийн гарам орчимд нэг га хэмжээтэй /1.0 га/ нэг байршил /#2024-15666/ https://mle.mn/#/auction/detail/21723Багануур дүүргийн 5 дугаар хороо, Нарийн нуур хэсэгт нэг га хэмжээтэй /1.0 га/ нэг байршил /#2024-15696/ https://mle.mn/#/auction/detail/21726Баянзүрх дүүргийн 20 дугаар хороо, Арцатын ам орчимд нэг га хэмжээтэй /1.0 га/ нэг байршил /#2024-15689/ https://mle.mn/#/auction/detail/21718 Худалдаа нийтийн үйлчилгээний газрын зориулалтаар;Багахангай дүүргийн 1 дүгээр хороо, Өндөр толгой орчимд тэг зууны зургаан га хэмжээтэй /0.06 га/ нэг байршил /#2024-15669/ https://mle.mn/#/auction/detail/21728Үйлдвэрлэлийн барилга, байгууламжийн газрын зориулалтаар;Багахангай дүүргийн 1 дүгээр хороо, Үйлдвэрийн бүсийн зүүн урд талд хоёр га хэмжээтэй /2.0 га/ нэг байршил /#2024-15705/ https://mle.mn/#/auction/detail/21727 Амины орон сууцны зориулалтаар;Сонгинохайрхан дүүргийн 21 дүгээр хороо, Гурав жаран есийн гарам орчимд хоёр га хэмжээтэй /2.0 га/ нэг байршил /#2024-15655/ https://mle.mn/#/auction/detail/21721Баянзүрх дүүргийн 35 дугаар хороо, Улиастай ам орчимд тэг аравны таван га хэмжээтэй /0.5 га/ нэг байршил /#2024-15692/ https://mle.mn/#/auction/detail/21719Хүлэмж дарлагын зориулалтаар;Багануур дүүргийн 5 дугаар хороо, Нарийн нуур хэсэг орчимд тэг аравны таван га хэмжээтэй /0.5 га/ нэг байршил /#2024-15695/ https://mle.mn/#/auction/detail/21725 Мод үржүүлгийн газрын зориулалтаар;Сонгинохайрхан дүүргийн 21 дүгээр хороо, Бороожийн ам орчимд гурав аравны таван га хэмжээтэй /3.5 га/ нэг байршил /#2024-15657/ https://mle.mn/#/auction/detail/21722Дуудлага худалдаанд оролцогч хүсэлтээ 2024 оны 08 дугаар сарын 29-ний өдрийн 09:00 цагаас эхлэн 2024 оны 09 дүгээр сарын 4-ний  өдрийн 15:00 цаг хүртэл WWW.MLE.MN цахим системээр бүртгүүлэн, баталгаажуулна. Холбоо барих утас: 77771285, 80771285 НИЙСЛЭЛИЙН ГАЗАР ЗОХИОН БАЙГУУЛАЛТЫН АЛБА

Монгол Улсын Их Хурлын Тамгын газраас 2022 оноос эхлэн ерөнхий боловсролын сургуулийн сурагчид, их, дээд сургуулийн оюутан, залууст зориулсан “Парламентын боловсрол” хөтөлбөрийг хэрэгжүүлж байгаа билээ. 2024-2025 оны хичээлийн шинэ жилийг тохиолдуулан өнөөдөр (2024.08.29) сурагчдын өөрөө удирдах байгууллагын төлөөлөл болох Монголын охидын зөвлөл, Монголын хөвгүүдийн зөвлөлийн сурагчид “Парламентын боловсрол” хөтөлбөрт хамрагдлаа.Улсын Их Хурлын Тамгын газрын дэд дарга Ү.Амарбат сурагчидтай уулзаж, хууль тогтоох үйл ажиллагааны онцлог, Улсын Их Хурлын 2024 оны намрын чуулганаар хэлэлцэхээр төлөвлөсөн хүүхдийн эрхийг хамгаалах хуулийн төслийн талаар мэдээлэл өглөө.Тэрбээр хэлсэн үгэндээ, “Парламентаас гарч байгаа аливаа шийдвэр бүхэн хэлэлцүүлэг, мэтгэлцээн, талуудын оролцоонд тулгуурлан гарах учиртай. Энэ зарчмыг ч баримтлан ажиллаж байна. Улсын Их Хурлын намрын ээлжит чуулганаар хүүхдийн эрх, эрх чөлөөг хангах чиглэлд анхаарсан хэд хэдэн хуулийн төслийг хэлэлцэхээр төлөвлөсөн. Тухайлбал, Өсвөр насны хүүхдүүдийн дунд өргөн хэрэглэгдэх болсон цахилгаан дугуйны хэрэглээний асуудал байгаа. Нэг талаар авто замын түгжрэлд хэрэгцээтэй байгаа боловч нөгөө талаар хүүхдүүдийн амь нас, эрүүл мэнд, аюулгүй байдалд сөрөг үр дагавар үзүүлж байна. Хүүхдийн эрх чөлөө, аюулгүй байдлыг хангахад оновчтой шийдэл гаргах хэрэгтэй болж байгаа учраас эрх зүйн зохицуулалт зайлшгүй шаардлагатай. Мөн электрон тамхины хэрэглээний асуудал бий. Электрон тамхийг утаат тамхитай адилтгах эсэх, зарж борлуулах цэг, хэрэглэгчдийн эрүүл мэнд зэрэг олон талын зохицуулалт орхигдсон. Энэ мэтчилэн шинэ тутамд үүссэн асуудлуудыг шийдэхэд олон нийтийн дунд нээлттэй хэлэлцүүлэг, мэтгэлцээнийг зохион байгуулж, талуудын үндэслэлтэй байр суурийг сонсож, шийдвэрээ гаргах хэрэгтэй. Энэ чиглэлд Улсын Их Хурал, түүний Тамгын газар онцгой анхаарч ажиллана” гэлээ.Хөтөлбөрийн хүрээнд сурагчдад парламентат ёсны талаар дэлгэрэнгүй мэдээлэл өгч, Улсын Их Хурлын үйл ажиллагаа, Төрийн ордонтой танилцах аялалд оролцуулсан юм. Мөн Монголын мэтгэлцээний нэгдсэн танхимтай хамтран сурагчдын дунд “Сурагчдад цахим орчны дарамт нь шууд дарамтаас илүү хор нөлөөтэй” сэдвээр мэтгэлцээний тэмцээнийг зохион байгуулав.Мэтгэлцээний нотлогч, няцаагч багийн гишүүд үе тэнгийнхэндээ цахим орчныг зөв хэрэглэж сурах, өөрсдийн хувийн мэдээллийг хамгаалж байхыг уриалж, асуудал дэвшүүлэн мэтгэлцлээ. Уг мэтгэлцээний бичлэгийг видео хичээл болгож, Улсын Их Хурлын албан ёсны нийгмийн сүлжээний хаягаар дамжуулан олон нийт, өсвөр үеийнхэнд түгээх юм.Мэтгэлцээнийг явцуу утгаар харвал хэдэн хүн тойрч суугаад гоё сайхан зүйл ярилцаж байгаа мэт боловч том агуулга, философийн хувьд харвал хүнийг эрхийг бүрэн дүүрэн хангаж, эдлүүлэхийн төлөө юуг хийх, ямар гарц шийдэл байгааг үндэслэлтэй, нотолгоотой ярилцдаг, хэлэлцдэг талбар. Ардчилсан нийгэмд мэтгэлцээн нь улс төрийн үйл явцыг ойлгож, өөрийн үзэл бодлоо хамгаалах арга хэрэг болдог гэдгийг Монголын мэтгэлцээний нэгдсэн танхимын тэргүүн С.Жаргалсайхан онцлоод сурагчдад амжилт хүслээ.Мөн Улсын Их Хурлын дарга Д.Амарбаясгалан сурагчдад мэндчилгээ дэвшүүлснийг Улсын Их Хурлын даргын зөвлөх Н.Булгантамир уламжлав.Улсын Их Хурлын дарга Д.Амарбаясгалан мэндчилгээндээ, “Эрдэм номын их аяны гараа, мэдлэг оюуны их замд хөтлөх өртөө болсон хичээлийн шинэ жилийн босгон дээр парламентын үйл ажиллагаатай танилцаж, өөрсдөдөө тулгарч буй асуудлаар нээлттэй мэтгэлцэж, санал шийдэл дэвшүүлж байгаад Улсын Их Хурлын даргын хувьд талархал илэрхийлье. Хүүхдүүд та бүхэн монгол ёс уламжлал, түүхээ мэддэг, ахас дээдсээ хүндэлдэг, хүний эрхийг дээдэлдэг, парламентын засаглалаа мэддэг, өөрийн гэсэн үзэл бодолтой, дэлхийд өрсөлдөх чадвартай монгол иргэн болж төлөвших нь эх орондоо оруулж буй хамгийн том хувь нэмэр билээ. Эрдэм номын мөрөөр ирээдүйн өнгийг зурж, эх орныхоо хөгжил дэвшлийн буухиаг үргэлжлүүлэх эрхэм дүү нартаа хичээл сурлагын өндөр амжилт хүсье” гэжээ хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.  

Онцгой байдлын байгууллагаас хичээлийн шинэ жил эхлэх гэж байгаатай холбогдуулан улсын хэмжээнд үйл ажиллагаа явуулж байгаа боловсролын байгууллагын барилга байгууламжид галын аюулгүй байдлыг хангах төлөвлөгөөт хяналт шалгалтыг зохион байгуулж байна. Хяналт шалгалт энэ сарын 20-ны өдрөөс ирэх есдүгээр сарын 27-ныг хүртэл үргэлжлэх юм. Энэ хүрээнд алба хаагчид галын аюулгүй байдлыг хангуулах, илэрсэн зөрчил дутагдлыг арилгуулах мэргэжил, аргазүйн зөвлөгөө өгч ажиллаж байна.